اسلام آباد ٹریفک پولیس نے 14، 15 اور 16 اکتوبر 2024 کو ہونے والی شنگھائی تعاون تنظیم (SCO) کانفرنس کے لیے جامع ٹریفک ڈائیورشن پلان ترتیب دے دیا ہے۔
اس پلان کے تحت 1100 سے زائد ٹریفک افسران شہر میں موجود ہوں گے تاکہ ٹریفک کی روانی کو برقرار رکھا جا سکے۔مختلف اوقات میں ٹریفک میں تبدیلیاں کی جائیں گی، جس کی وجہ سے عوام الناس سے درخواست کی گئی ہے کہ وہ متبادل راستے استعمال کریں۔ پشاور سے روات جانے والے افراد کے لیے تجویز کیا گیا ہے کہ وہ ٹیکسلا، موٹر وے، چکری انٹرچینج اور چک بیلی روڈ استعمال کریں۔ اسی طرح، لاہور سے پشاور جانے والے شہری روات، چک بیلی روڈ اور موٹر وے کا راستہ اختیار کریں۔
مارگلہ روڈ سے راولپنڈی جانے والوں کو نائنتھ ایونیو استعمال کرنے کی ہدایت کی گئی ہے۔ فیصل ایونیو سے زیرو پوائنٹ جانے والی ٹریفک کو بھی نائنتھ ایونیو کی طرف موڑا جائے گا۔ بھارہ کہو سے راولپنڈی جانے والے شہری کورنگ روڈ اور بنی گالہ سے لہتراڑ روڈ کا راستہ اختیار کریں۔
راولپنڈی سے اسلام آباد آنے والے افراد کو صدر مری روڈ سے نائنتھ ایونیو استعمال کرنے کا مشورہ دیا گیا ہے، جبکہ زیر و پوائنٹ فیصل ایونیو سے کورال چوک تک ایکسپریس وے بند رہے گا۔ کرنل شیر خان شہید روڈ سے فیض آباد آنے والے افراد کو نائنتھ ایونیو سگنل سے اسٹیڈیم روڈ کا استعمال کرنے کی ہدایت کی گئی ہے۔
پشاور سے لاہور جانے والی ہیوی ٹریفک ٹیکسلا، موٹر وے اور فتح جنگ روڈ انٹرچینج کا راستہ اختیار کرے گی، جبکہ لاہور جی ٹی روڈ سے اسلام آباد اور راولپنڈی جانے والی ہیوی ٹریفک چک بیلی روڈ سے چکری انٹرچینج کا استعمال کرے گی۔
یہ بھی بتایا گیا ہے کہ 14، 15 اور 16 اکتوبر 2024 تک اسلام آباد میں ہر قسم کی ہیوی ٹریفک کا داخلہ بند رہے گا۔ شہریوں سے اپیل کی گئی ہے کہ وہ ان تاریخوں میں احتیاط برتیں اور متبادل راستوں کا استعمال کریں۔
By 
