اسمگل شدہ گاڑیوں یا ایسٹ ڈکلیئریشن پر ایمنسٹی اسکیم کے امکانات ختم ، حکومت کی آئی ایم ایف یقین دہانی

حکومت کی جانب سے آئی ایم ایف کو یقین دہانی کروا دی گئی ہے کہ اسمگل شدہ گاڑیوں یا ایسٹ ڈکلیئریشن کے حوالے سے کسی قسم کی ٹیکس ایمنسٹی اسکیم متعارف نہیں کی جائے گی۔ اس فیصلے کے تحت کسی بھی قسم کی ٹیکس چھوٹ، زیرو ریٹنگ یا ٹیکس کریڈٹ فراہم نہیں کیا جائے گا، اور مختلف شعبوں کو ترجیحی ٹیکس ٹریٹمنٹ بھی نہیں دیا جائے گا۔

اسلام آباد، کراچی اور لاہور کے ٹیکس دفاتر میں رسک مینجمنٹ پر عمل درآمد کیا جائے گا۔ حکومت نے یہ عزم کیا ہے کہ تین سال میں ٹیکس ٹو جی ڈی پی میں 3 فیصد اضافہ کیا جائے گا، اور 2027-28 تک جی ڈی پی کے 2 فیصد کے مساوی پرائمری سرپلس کا ہدف رکھا جائے گا۔حکومت نے یقین دہانی کرائی ہے کہ کسی قسم کی سبسڈی یا فیول سبسڈی اسکیم متعارف نہیں کی جائے گی، اور رواں مالی سال میں اور بعد میں بھی ٹیکس چھوٹ یا سبسڈی سے اجتناب کیا جائے گا۔ پہلے سے جاری سبسڈیز اور استثنیٰ کا بتدریج خاتمہ کیا جائے گا۔

یہ بھی پڑھیں: پی ٹی آئی سینیٹر سیف اللہ ابڑو گرفتار

حکومت نے آئی ایم ایف کو یہ بھی یقین دلایا ہے کہ فارن ایکسچینج مارکیٹ میں غیر ضروری مداخلت نہیں کی جائے گی۔ روپے کی قدر میں کمی روکنے کے لیے کوئی مصنوعی اقدامات نہیں کیے جائیں گے، اور لچکدار ایکسچینج ریٹ پالیسی پر عمل درآمد جاری رکھا جائے گا۔

سالانہ بجٹ سے ہٹ کر اضافی اخراجات نہیں کیے جائیں گے، اور کسی بھی اضافی اخراجات کے لیے پارلیمنٹ کی منظوری لازمی قرار دی گئی ہے۔ ترقیاتی منصوبوں کے انتخاب کے لیے میرٹ پر مبنی طریقہ کار اپنایا جائے گا، اور پی ایس ڈی پی میں شامل ترقیاتی منصوبوں کے حجم کی سالانہ حد مقرر کی جائے گی۔