علی امین گنڈا پور کا کم لاگت رہائشی اپارٹمنٹس کا افتتاح

وزیر اعلیٰ خیبر پختونخوا، علی امین گنڈا پور نے نوشہرہ کے علاقے جلوزئی میں نیا پاکستان ہاؤسنگ پروگرام کے تحت کم لاگت رہائشی فلیٹس کا افتتاح کیا۔ اس تقریب میں انہوں نے خطبہ بھی دیا۔

یہ ہاؤسنگ سکیم 150 کنال اراضی پر پھیلی ہوئی ہے اور اس کی تخمینی لاگت 3300 ملین روپے ہے۔ اس سکیم کے تحت 1320 کم لاگت اپارٹمنٹس تعمیر کیے جائیں گے، جن میں سے ہر ایک کا کورڈ ایریا 780 مربع فٹ ہے۔ اس سکیم سے مستفید ہونے کے لیے 50 ہزار روپے سے کم ماہانہ آمدنی رکھنے والے افراد اہل ہیں۔ ہر اپارٹمنٹ پر وفاقی حکومت کی جانب سے 3 لاکھ جبکہ صوبائی حکومت کی جانب سے 4 لاکھ روپے کی سبسڈی فراہم کی گئی ہے۔

علی امین گنڈا پور نے افتتاحی تقریب میں کہا کہ کم آمدنی والے لوگوں کو سستے گھر فراہم کرنا بانی چیئرمین پی ٹی آئی کا وژن ہے۔ انہوں نے مزید کہا کہ ان کے دور حکومت میں مختلف علاقوں میں کم لاگت رہائشی سکیموں پر کام شروع کیا گیا تھا اور بہت سی سکیموں پر کام مکمل ہو چکا ہے۔ انہوں نے اس سکیم کی جلد تکمیل میں محکمہ ہاؤسنگ اور دیگر محکموں کی کوششوں کو سراہا۔

وزیر اعلیٰ نے جلوزئی ہاؤسنگ سکیم میں ایک سپورٹس کمپلیکس کے منصوبے کا بھی افتتاح کیا، جس کی تخمینی لاگت 17 کروڑ روپے ہے۔ یہ سپورٹس کمپلیکس سکواش کورٹ، فٹ بال گراؤنڈ، مصنوعی ٹینس اور باسکٹ بال کورٹس کے ساتھ ساتھ 500 میٹر طویل جاگنگ ٹریک پر مشتمل ہے۔

علی امین گنڈا پور نے مزید کہا کہ صوبائی حکومت نے اس منصوبے کی جلد تکمیل کے لیے ہر فلیٹ پر 4 لاکھ روپے کی سبسڈی دی ہے۔ حکومت کی ذمہ داری ہے کہ لوگوں کو رہائش، تعلیم، صحت اور ٹرانسپورٹ کی معیاری سہولیات فراہم کرے۔ انہوں نے کہا کہ بہت جلد نوشہرہ میں بی آر ٹی کے فیڈر روٹ کا افتتاح کیا جائے گا اور ہاؤسنگ سکیم میں بجلی کی فراہمی کے لیے گرڈ کی تعمیر پر بھی کام شروع کیا جائے گا۔

علی امین گنڈا پور نے کہا کہ انہوں نے دوران ڈیوٹی شہید ہونے والے سرکاری اہلکاروں کے ورثاء کے لیے مفت پلاٹ دینے کا اعلان کیا ہے اور اس پر عملدرآمد جاری ہے۔ صوبائی حکومت کی پالیسی ہے کہ جو شعبے پیچھے رہ گئے ہیں، انہیں آگے لایا جائے۔ انہوں نے بتایا کہ موجودہ صوبائی حکومت کے اقدامات کے نتیجے میں آمدن میں 40 فیصد اضافہ ہوا ہے اور وہ اپنے لوگوں کو بہتر سہولیات فراہم کرنے کے لیے کوشاں ہیں۔