نئی کمیٹیوں کا بائیکاٹ نہیں کریں گے : تحریک انصاف کا اعلان

پاکستان تحریک انصاف نے 26 ویں آئینی ترمیم کے بعد نئی بننے والی کمیٹیوں کا بائیکاٹ نہ کرنے کا اعلان کردیا ہے۔

تفصیلات کے مطابق نجی ٹی وی چینل میں گفتگو کے دوران پی ٹی آئی کے چیئرمین بیرسٹر گوہر علی نے کہا کہ یہ تاثر غلط دیا جا رہا ہے کہ جسٹس منصور علی شاہ تحریک انصاف کے جج ہیں، ہمارا کوئی جج نہیں ہے۔

انہوں نے واضح کیا کہ پاکستان تحریک انصاف نئی بننے والی کمیٹیوں کا بائیکاٹ نہیں کرے گی، نئی کمیٹیوں کیلئے نام ضرور د یں گے ۔ خیال رہے کہ 26 ویں آئینی ترمیم کے حوالے سے چیف جسٹس کی تقرری کیلئے خصوصی پارلیمانی کمیٹی کی تشکیل کا نوٹیفکیشن جاری کردیا گیا ہے۔

تحریک انصاف کی جانب سے بیرسٹر گوہر ، صاحبزادہ حامد رضا اور سینیٹر علی ظفر ججز کی تقرری کے لئے خصوصی پارلیمانی کمیٹی کا حصہ ہو نگےجب کہ مسلم لیگ ن کی جانب سے خواجہ آصف، احسن اقبال، شائستہ پرویز ملک اور اعظم نذیر تارڑ اورپاکستان پیپلزپارٹی کی طرف سے راجہ پرویز اشرف،سید نوید قمر اور سینیٹر فاروق ایچ نائیک کمیٹی کا حصہ ہوں گے۔

یہ بھی پڑھیں:عمران خان کو جیل میں جو سہولیات حاصل ہیں وہ عام بندہ اپنی پوری زندگی حاصل نہیں کر سکتا، صحافی طارق چوہدری

متحدہ قومی موومنٹ (ایم کیوا ایم )کی طرف سے رعنا انصار اور جمعیت علمائے اسلام سے کامران مرتضیٰ کمیٹی کا حصہ ہوں گے۔ چیف جسٹس کی تعیناتی کیلئے قائم خصوصی پارلیمانی کمیٹی کا اجلاس آج شام 4 بجے پارلیمنٹ ہاؤس میں بلالیا گیا ہے۔ 26 ویں آئینی ترمیم کے تحت نئے چیف جسٹس کی تقرری، موجودہ چیف جسٹس کی رٹائرمنٹ سے 3 دن قبل ہوگی، نئے چیف جسٹس کی تعیناتی میں 24 گھنٹے باقی رہ گئے ۔