26ویں آئینی ترمیم میں اراکینِ اسمبلی پر دباؤ کا معاملہ ،سپریم کورٹ میں ایک اور درخواست دائر کر دی گئی

26 ویں آئینی ترمیم کے حوالے سے اراکینِ اسمبلی پر مبینہ دباؤ کے معاملے پر سپریم کورٹ میں انکوائری کرنے کے لیئے ایک اور درخواست دائر کر دی گئی ہے۔

تفصیلات کے مطابق سپریم کورٹ میں 26 ویں آئینی ترمیم کے خلاف ایک اور درخواست دائر کر دی گئی ہے اور درخواست میں استدعا کی گئی ہے کہ 26ویں آئینی ترمیم میں ارکان اسمبلی نے ووٹ رضا کارانہ طور پر ڈالا یا دباؤ کے تحت اس حوالے سے انکوائری کی جائے۔ درخواست گزار نے کورٹ میں دائر درخواست میں استدعا کی ہےکہ سپریم کورٹ معاملے کے خود انکوائری کرے یا جوڈیشیل کمیشن کے ذریعے ارکان پر دباؤ کے معاملے کی انکوائری کروائے، سپریم کورٹ میں دائردرخواست میں استدعا کی گئی ہے کہ قرار دیا جائے 26ویں آئینی ترمیم درست طریقے سے منظور نہیں کی گئی۔

مزید پڑھیں: 26ویں آئینی ترمیم میں جس طرح نمبرز پورے کئے گئے اسکی مذمت کیجانی چاہیے: عمر ایوب خان

دائر درخواست میں مزید استدعا کی گئی ہے کہ اراکینِ اسمبلی کے انتخابی تنازعات الیکشن ٹریبونل میں زیر التوا ہیں اور26ویں آئینی ترمیم کو عدلیہ کی آزادی کے خلاف قرار دے کر خارج کیا جائے۔دائر درخواست کے متن میں کہا گیا ہےکہ عدلیہ کی آزادی آئین کا بنیادی ڈھانچہ ہے اور ججز کی سالانہ کارکردگی کا جائزہ ، چیف جسٹس کی تعیناتی کے طریقہ کار میں تبدیلی، اور آئینی بینچوں کا قیام عدلیہ کی آزادی کے منافی ہے، اور26ویں آئینی ترمیم کے خلاف درخواست پر آئینی بینچز سماعت نہیں کر سکتے۔سپریم کورٹ میں 26ویں آئینی ترمیم کے خلاف درخواست افراسیاب خٹک نے دائر کی ۔26ویں آئینی ترمیم کے خلاف درخواست میں ن لیگ، پیپلز پارٹی سمیت تمام سیاسی جماعتوں کو فریق بنایا گیا ہے۔