اسلام آباد ہائیکورٹ کا عمران خان کا میڈیکل چیک اپ کروانے کیلئے بورڈ تشکیل دینے کا حکم

توشہ خانہ 2 کیس میں عمران خان کی اہلیہ بشریٰ بی بی کی رہائی کے بعد اسلام آباد ہائیکورٹ نے عمران خان سے متعلق بڑا حکم جاری کر دیا۔

تفصیلات کے مطابق اسلام آباد ہائیکورٹ نے عمران خان کے چیک اپ کیلئے میڈیکل بورڈ تشکیل دینے اور ان کے ذاتی معالج ڈاکٹر فیصل سلطان کو شامل کرنے کا حکم جاری کر دیا۔ اسلام آباد ہائیکورٹ کے جسٹس میاں گل حسن اورنگزیب نے عمران خان کے اپنے ذاتی معالجین سے میڈیکل چیک اپ کیلئے دائر درخواست پر فیصلہ سنایا۔ عدالت نے عمران خان کے چیک اپ کیلئے میڈیکل بورڈ تشکیل دینے کا حکم دیدیا۔

مزید پڑھیں: بشری بی بی اڈیالہ جیل سے رہا، بنی گالہ پہنچ گئیں

عدالت نے ایگزیکٹو پمزکو حکم دیا کہ عمران خان کے میڈیکل چیک اپ کیلئے بورڈ تشکیل دیں اور رپورٹ رجسٹرار آفس میں جمع کروائیں۔ عدالتی آرڈر کی کاپی سپریٹنڈنٹ اڈیالہ جیل کو بھی عملدرآمد کیلئے بھیجی جائے۔ عدالت نے حکم نامے میں کہا کہ عمران خان کی درخواست ہدایات کیساتھ نمٹائی جاتی ہے۔

فیصلے میں مزید کہا گیا ہے کہ عمران خان کی عمر 72سال ہے، وہ سابق وزیراعظم اور انڈر ٹرائل قیدی ہیں۔ اڈیالہ جیل میں سیکیورٹی اقدامات کوالیفائیڈ ڈاکٹر کے بی کلاس قید کے چیک اپ میں رکاوٹ نہیں ہوسکتے۔