وفاقی وزیر خزانہ محمد اورنگزیب کا کہنا ہے کہ تنخواہ دار طبقے پر ٹیکس کا مزید بوجھ نہیں ڈالیں گے۔
تفصیلات کے مطابق وزیر خزانہ نے فرانسیسی نیوز ایجنسی کو انٹرویو دیتے ہوئے کہا کہ پاکستان میں تنخواہ دار طبقے کی مشکلات کو سمجھتے ہیں اور اس بات کی ضرورت ہے کہ ٹیکسوں کے بوجھ میں اضافہ نہ ہو۔ وزیر خزانہ نے مزید کہا کہ صنعتی شعبہ بھی ٹیکس کی زیادہ سے زیادہ حد کو پہنچ چکا ہے۔ انہوں نےکہا کہ ہمیں زرعی آمدن سے ٹیکس کی وصولی کو بہتر بنانا اور رئیل اسٹیٹ اور ریٹیلز سیکٹرز سے ٹیکس آمدن کو بڑھانا ہوگا۔
ان کا کہنا تھا کہ ملک میں 52 لاکھ سے زائد انکم ٹیکس گوشوارے جمع ہوئے ہیں اور ٹیکس بیس میں 29 فیصد اضافہ ہوا ہے۔ انہوں نےمزید کہا کہ سرکاری کارپوریشنز میں چوری برداشت نہیں کی جاسکتی اور بجلی کے نقصانات کو بھی قابو کرنا ہوگا۔ پی آئی اے کی نجکاری کے حوالے سے وزیر خزانہ نے بتایا کہ یہ عمل نومبر میں مکمل کر لیا جائے گا۔
محمد اورنگزیب نے بتایا کہ پی آئی اے کی بولی میں حصہ لینے والوں کو جانچ پڑتال کا موقع فراہم کیا جائے گا جبکہ اثاثہ جات کی جانچ پڑتال کے باعث نجکاری کے عمل میں تاخیر ہوئی۔ انہوں نے بتایا کہ ملک کی معیشت میں قرضوں کا حصہ 69 فیصد تک پہنچ چکا ہے۔
By 
