شدید دھند کا راج، مختلف مقامات پر موٹرویز کو بند کر دیا گیا

پنجاب میں دھند اور سموگ کے باعث مختلف مقامات پر موٹرویز کو بند کر دیا گیا۔

ترجمان موٹر وے پولیس سید عمران احمد کے مطابق لاہور سے کوٹ مومن تک موٹروے ایم 2 دھند اور سموگ کی وجہ سے بند ہے جبکہ لاہور سیالکوٹ موٹروے اور موٹروے ایم 3 کو لاہور سے درخانہ تک بھی بند کیا گیا ہے۔

مزید پڑھیں: سموگ کی شدت برقرار، ناک، کان، گلے، آنکھوں اور سینے کے مریضوں کی تعداد میں دوگنا اضافہ

حکام نے مزید بتایا کہ موٹروے ایم 4 پنڈی بھٹیاں سے عبدالحکیم تک اور موٹروے ایم 5 ملتان سے سکھر تک بھی بند کر دی گئی ہیں۔

ترجمان موٹر وے پولیس کا کہنا تھا کہ ان روڈز کو عوام کی حفاظت اور محفوظ سفر کو یقینی بنانے کے لیے بند کیا گیا ہے۔ اس کے ساتھ ہی روڈ یوزرز کو مشورہ دیا گیا ہے کہ وہ زیادہ سے زیادہ دن کے اوقات میں سفر کریںکیونکہ دھند کے موسم میں صبح 10 بجے سے شام 6 بجے تک سفر کرنے کے لیے بہترین اوقات ہیں۔

موٹر وے پولیس نے مزید کہا کہ روڈ یوزرز اپنی گاڑیوں میں آگے اور پیچھے دھند والی لائٹس کا استعمال کریں، غیر ضروری سفر سے گریز کریں، تیز رفتاری سے پرہیز کریں اور اگلی گاڑی سے مناسب فاصلہ رکھیں تاکہ سفر محفوظ رہ سکے۔