موٹرویز کو مختلف مقامات پر کھول دیا گیا

دھند کی شدت میں کمی اور حدِ نگاہ میں بہتری آنے کے بعد موٹرویز کو مختلف مقامات پر کھول دیا گیا۔

موٹروے پولیس کے ترجمان سید عمران احمد کے مطابق لاہور – سیالکوٹ موٹروے اور دیگر موٹر ویز کو حد نگاہ میں بہتری کے بعد دوبارہ کھول دیا گیا ہے۔

انہوں نے بتایا کہ موٹروے ایم 2جو لاہور سے کوٹ مومن تک بند تھی، حد نگاہ میں بہتری آنے کے بعد کھول دی گئی ہے۔ اسی طرح موٹروے ایم 3جو لاہور سے عبدالحکیم تک بند تھی کو بھی حد نگاہ میں بہتری کے بعد کھول دیا گیا ہے۔

ترجمان موٹروے پولیس نے عوام کو خبردار کیا ہے کہ وہ سفر کرتے وقت احتیاطی تدابیر اختیار کریں اور سڑکوں کی صورتحال سے آگاہ رہیں، کیونکہ دھند اور سموگ کی صورت میں حد نگاہ میں تبدیلی آ سکتی ہے۔

مزید پڑھیں: سوموار کے روز ملک کے مختلف علاقوں میں بارش کی پیشنگوئی

دوسری جانب پشاور میں شدید دھند اور سموگ کی وجہ سے حد نگاہ چند میٹر رہ گئی اور شہر میں فضائی آلودگی میں بے پناہ اضافہ ہو گیا۔

حالیہ رپورٹ کے مطابق پشاور پاکستان کے آلودہ ترین شہروں میں تیسرے نمبر پر آ گیا ہے اور اس شہر میں 509 کا ائیر کوالٹی انڈیکس ریکارڈ کیا گیا ہے۔

مختلف مقامات پر نصب ائیر کوالٹی میٹرز سے حاصل ہونے والے ڈیٹا کے مطابق یوسف آباد میں 784، حیات آباد میں 667، دلہ زاک روڈ پر 509، جی ٹی روڈ پر 320، اور امریکی کونسلیٹ کے قریب 332 کا ائیر کوالٹی انڈیکس ریکارڈ کیا گیا ہے۔

پشاور میں پانچ اہم مقامات پر ائیر کوالٹی میٹر نصب کیے گئے ہیں تاکہ آلودگی کی سطح کو مانیٹر کیا جا سکے اور عوام کو صحت کے حوالے سے آگاہ کیا جا سکے۔

شہریوں کو مشورہ دیا جا رہا ہے کہ وہ باہر نکلتے وقت احتیاط کریں اور ماسک کا استعمال کریںکیونکہ سموگ کی وجہ سے سانس لینے میں دشواری اور دیگر صحت کے مسائل میں اضافہ ہو سکتا ہے۔