اسلام آباد: محکمہ داخلہ نے جیل قوانین کی خلاف ورزی پر قیدیوں کی سزا دینے کے لیے نئے قواعد و ضوابط جاری کر دیے ہیں۔ ان ضوابط کے تحت، جیل میں قیدیوں کو صرف قواعد کے مطابق سزا دی جا سکے گی۔
محکمہ داخلہ کے ترجمان کے مطابق جیل قوانین کی خلاف ورزی پر سزا کو میرٹ کے مطابق رکھنے کیلئے سپروائزری افسر کے اختیارات میں اضافہ کردیا گیا ہے۔ سپرنٹنڈنٹ جیل یا کوئی بھی افسر ضابطے کے برخلاف کسی قیدی کو سزا نہیں دے سکے گا۔جیل قوانین کی خلاف ورزی پر سپرنٹنڈنٹ جیل انکوائری کے بعد قیدی کو سزا دینے کا اختیار رکھتا ہے۔
سپرنٹنڈنٹ جیل کسی بھی قیدی کو سزا دینے سے قبل باضابطہ طور پر متعلقہ ڈی آئی جی جیل کو مطلع کرے گا۔محکمہ داخلہ کے ترجمان کے مطابق سزا دینے سے قبل مکمل انکوائری کی جائے گی اور رپورٹ فوری طور پر متعلقہ ڈی آئی جی جیل کو بھجوائی جائے گی۔ دوران انکوائری قیدی کو اپنی بے گناہی ثابت کرنے کا پورا موقع دیا جائے گا اور انکوائری کی تمام کارروائی تحریری طور پر عمل میں لائی جائے گی۔
متعلقہ ڈی آئی جی جیل جانچ پڑتال کے بعد کسی بھی قیدی کو دی گئی سزا کو کالعدم اور برقرار رکھ سکتا ہے۔ سپروائزری افسر کسی بھی وقت کسی بھی قیدی کو دی گئی سزا کی جانچ کرسکتا ہے۔جیل قوانین کی خلاف ورزی پر دی جانے والی سزا کا دورانیہ بھی طے کر دیا گیا ہے۔
اگر کسی قیدی کو حفاظت کے پیش نظر علیحدہ رکھا جائے تو اسے سزایافتہ بلاک میں نہیں رکھا جا سکتا۔شفاف انکوائری کے بعد پنشمنٹ بلاک میں رکھے جانے والے قیدی کو سزا میں معافی کے حق سے محروم کر دیا جائے گا۔ سیکرٹری داخلہ پنجاب نے جاری کردہ SOPs پر سختی سے عملدرآمد کی ہدایت کی ہے
By 
