خواجہ آصف نے بشریٰ بی بی کی دوبارہ گرفتاری کا عندیہ دے دیا

وزیر دفاع خواجہ آصف نے کہا ہے کہ ویڈیو بیان پر مقدمات میں بشریٰ بی بی ضرورگرفتار ہوں گی۔

نجی ٹی وی کے پروگرام میں گفتگو کرتے ہوئے خواجہ آصف کا کہنا تھا کہ خیبرپختونخوا میں آگ لگی ہوئی ہے، علی امین گنڈا پوراحتجاج کر رہے ہیں، انہیں اسلام آباد فتح کرنے کے بجائے صوبے میں ہونا چاہیے، گن پوائنٹ پرمذاکرات پریقین نہیں رکھتا، ایسےلوگوں سےمذاکرات نہیں کیے جا سکتے۔

انہوں نے کہا کہ خیبرپختونخوا میں بدترین خون ریزی ہورہی ہے، امن وامان صوبوں کی ذمہ داری ہے،اگرمسلح جتھے اسلام آباد لاسکتےہیں توپارا چناربھی جائیں۔

وزیر دفاع نے مزید کہا  کہ علی امین گنڈا پورکے قافلے سے ہمیں کوئی پریشانی نہیں، وزیر اعلیٰ خیبر پختونخوا جیسےلوگوں کی کوئی ساکھ نہیں ہے، بانی پی ٹی آئی کی رہائی سے زیادہ صوبے کا امن اہم ہے۔

راستوں کی بندش کے حوالے سے سوال پر خواجہ آصف کا  کہنا تھا کہ اسلام آباد کےراستے بند نہیں کھلےہیں، پنجاب کے کسی شہر سے ان کےلوگ نہیں نکلے، لاہورسے ان کی لیڈرشپ ڈیڑھ سال سےغائب ہے۔

بشریٰ کے ویڈیو بیان پر مقدمے کے جواب میں انہوں نے کہا کہ بشریٰ بی بی کی گرفتاری ضرور ہوگی۔