وزیرِ اعظم شہباز شریف کا سری نگر ہائی وے پر حملے کی شدید مذمت

اسلام آباد: وزیرِ اعظم محمد شہباز شریف نے سری نگر ہائی وے پر مظاہرین کی جانب سے رینجرز اور پولیس اہلکاروں پر گاڑی سے حملے کی شدید الفاظ میں مذمت کی ہے۔

انہوں نے احتجاجیوں کی گاڑی سے کچلے گئے رینجرز اہلکاروں کی شہادت پر گہرے دکھ اور غم کا اظہار کرتے ہوئے واقعے میں ملوث افراد کی فوری نشاندہی اور انہیں قرار واقعی سزا دلوانے کی ہدایت کی۔ وزیرِ اعظم نے حملے میں زخمی ہونے والے رینجرز اور پولیس اہلکاروں کو بہترین طبی سہولت فراہم کرنے کی بھی ہدایت کی

وزیرِ اعظم نے کہا کہ انتشاری ٹولہ جان بوجھ کر قانون نافذ کرنے والے اداروں کو نشانہ بنا رہا ہے، حالانکہ پولیس اور رینجرز کے اہلکار شہر میں امن و امان کے قیام کے لیے تعینات کیے گئے ہیں۔ انہوں نے مزید کہا کہ انتشاری ٹولہ انقلاب نہیں، بلکہ خونریزی چاہتا ہے اور یہ پُرامن احتجاج کی آڑ میں شدت پسندی پھیلا رہا ہے۔ وزیرِ اعظم نے کہا کہ پاکستان کسی بھی قسم کے انتشار اور خون ریزی کا متحمل نہیں ہو سکتا۔
شہباز شریف نے کہا کہ مذموم سیاسی مقاصد کے لیے خونریزی ناقابلِ قبول اور انتہائی قابلِ مذمت ہے۔

وزیرِ اعظم نے شہید اہلکاروں کی بلندی درجات اور ان کے اہل خانہ کے لیے صبر جمیل کی دعا کی اور کہا کہ وہ اور پوری قوم شہید ہونے والے رینجرز اور پولیس اہلکاروں کو خراجِ عقیدت پیش کرتے ہیں۔