انصاف کی جلد فراہمی کیلئے چیف جسٹس یحییٰ آفریدی کا دور دراز اضلاع کے دوروں کا فیصلہ

انصاف کی جلد فراہمی، ضلعی عدلیہ کو بہتر بنانے اور درپیش چیلنجز سے نمٹنے کیلئے چیف جسٹس یحییٰ آفریدی نے دور دراز اضلاع کے ذاتی دوروں کا فیصلہ کیا ہے۔

سپریم کورٹ کی جانب سے جاری ا علامیے کے مطابق انصاف کی جلد فراہمی کو یقینی بنانے، ضلعی عدلیہ میں بہتری اور درپیش چیلنجز سے نمٹنے کے لیے چیف جسٹس نے ذاتی دوروں کا فیصلہ کیا ہے۔

اعلامیے کے مطابق چیف جسٹس یحییٰ آفریدی موقع پر پہنچ کر مسائل کا تدارک کریں گے۔ اسی سلسلے میں چیف جسٹس نے آج گوادر کا دورہ کیا، جہاں تربت، پنجگور اور چاغی سمیت دیگر اضلاع کے ڈسٹرکٹ اینڈ سیشن ججز نے چیف جسٹس سے ملاقات کی، چیف جسٹس نے اس ملاقات میں مسائل کے حل کی یقین دہانی کرائی۔

اعلامیے میں کہا گیا کہ چیف جسٹس سپریم کورٹ جسٹس یحییٰ آفریدی نے عدالتی افسران کے وقار کو مقدم رکھنے کا عزم کرتے ہوئے کہا ہے کہ پورے ملک کی عدلیہ کا وقار مجروح نہیں ہونے دیں گے۔ دُور دراز کی عدلیہ خصوصی توجہ کی متقاضی ہے۔

چیف جسٹس یحییٰ آفریدی نے متعلقہ ہائی کورٹس کو دُور دراز کی ضلعی عدلیہ پر توجہ مرکوز کرنے کی ہدایت کی۔ چیف جسٹس نے دُور دراز علاقوں میں کام کرنے والے عدالتی افسران کی خدمات کو سراہا۔

چیف جسٹس یحییٰ آفریدی کی زیر صدارت گوادر میں ہونے والے اجلاس میں اصلاحی نظام سے متعلق اہم امور پر غور کیا گیا اور بلوچستان کے لیے ذیلی کمیٹی کے قیام کی منظوری دی گئی، جو مختلف جیلوں کا دورہ کرے گی۔

کمیٹی نظام کو بہتر بنانے کے مقصد سے اصلاحات کا ایک جامع پیکیج پیش کرے گی۔اجلاس میں چیف جسٹس بلوچستان ہائیکورٹ جسٹس ہاشم خان کاکڑ سمیت ضلعی ججز نے شرکت کی۔