وزیراعلیٰ خیبرپختونخوا علی امین گنڈاپور نے کہا ہے کہ آئندہ سال سے تمام سرکاری اعلیٰ تعلیمی اداروں میں فیسوں کو آدھا کر دیا جائے گا۔
وزیر اعلیٰ خیبر پختونخوا علی امین خان گنڈا پور نے چیف منسٹر ایجوکیشن انڈومنٹ فنڈ کی رقم 1.2 ارب روپے سے بڑھا کر 2.4 ارب روپے کرنے کا اعلان کرتے ہوئے کہا ہے کہ اگلے مالی سال سے تمام سرکاری اعلیٰ تعلیمی اداروں میں فیسوں کو آدھا کر دیا جائے گا۔
انہوں نے وزیراعلیٰ ہاؤس پشاور میں منعقدہ اسکالرشپس کی تقسیم کی تقریب کے دوران اعلان کیا۔وزیراعلیٰ کا کہنا تھا کہ صوبائی حکومت صوبے کی آمدن بڑھانے کے لیے اپنے وسائل پر کام کر رہی ہے اور گزشتہ 9 مہینوں میں صوبے کی آمدن میں 44 فیصد اضافہ ہوا ہے۔
انہوں نے مزید کہا کہ صوبے کی بچیوں اور یتیم بچوں کو بارہویں جماعت تک مفت تعلیم دینے کے لیے 2 ارب روپے کا انڈومنٹ فنڈ قائم کر دیا گیا ہے۔علی امین گنڈا پور نے کہا کہ صوبائی حکومت نوجوانوں کو مکمل سپورٹ فراہم کرے گی اور بچوں کی تعلیم اور بہتر مستقبل پر زیادہ سے زیادہ وسائل خرچ کیے جائیں گے۔
رپورٹ کے مطابق چیف منسٹر ایجوکیشن انڈومنٹ فنڈ کے تحت اب تک 615 ملین روپے کی مدد سے 526 طلبہ کو اسکالرشپس فراہم کی جا چکی ہیں، جن میں 366 انڈر گریجویٹس اور 150 گریجویٹس شامل ہیں۔ اس کے علاوہ 10 گریجویٹس کو مختلف بین الاقوامی جامعات کے لیے بھی اسکالرشپس دی گئی ہیں۔
By 
