وزیر مملکت آئی ٹی شزا فاطمہ کا پاکستان میں انٹرنیٹ کی رفتار کم ہونے کا اعتراف

وزیر مملکت برائے انفارمیشن ٹیکنالوجی (آئی ٹی) شزا فاطمہ نے پاکستان میں انٹرنیٹ کی رفتار کم ہونے کا اعتراف کر لیا۔

نیشنل براڈ بینڈ نیٹ ورک فورم کی تقریب سے خطاب کرتے ہوئے وزیر مملکت شزا فاطمہ کا کہنا تھا کہ فائبرآئزیشن پالیسی اور فائیو جی سے انٹرنیٹ کی صورتحال میں بہتری آئے گی، وزیر اعظم نے اپنی سربراہی میں نیشنل ڈیجیٹل کمیشن بنایا ہے جو 5 سال کا لائحہ عمل پیش کرے گا، چاروں وزرائے اعلیٰ اور اہم وزراء کمیشن کا حصہ ہوں گے۔

یہ بھی پڑھیں : کرم گرینڈ جرگہ ختم نہیں ہوا، فریقین نے مشاورت کیلئے وقت مانگا ہے  ، بیرسٹر سیف

انہوں نے کہا کہ ڈیجیٹل پاکستان کا بل آج قومی اسمبلی میں پیش کیا جائے گا، بل جلد منظور ہونے کی امید ہے، بل کی منظوری کے بعد نیشنل ڈیجیٹل کمیشن کا قیام عمل میں لایا جائے گا، جس کے سربراہ وزیراعظم ہوں گے، امید ہے اپوزیشن ڈیجیٹل پاکستان بل پر ساتھ دے گی۔

ان کا کہنا تھا کہ نیشنل ڈیجیٹل کمیشن کے ماتحت ڈیجیٹل اتھارٹی بنائی جائے گی، آنے والے سالوں میں پاکستان میں انٹرنیٹ کی رفتار بہتر ہوگی، ٹیکنالوجی انفراسٹرکچر میں سرمایہ کاری آئے گی، نیشنل فائبرآئزیشن پالیسی پر تیزی سے کام جاری ہے، فائیو جی سپیکٹرم کی نیلامی اپریل میں ہوگی، فائیو جی سپیکٹرم کی نیلامی اور فور جی کو بہتر کیا جائے گا۔

وزیر مملکت نے کہا کہہ پاکستان میں سائبر سیکورٹی کے چیلنجز درپیش ہیں، روزانہ کی بنیاد پر سائبر سیکورٹی کے حملے ہوتے ہیں، سائبر سیکورٹی اور ڈیٹا پروٹیکشن کی ذمے داری بھی ہماری ہے، اس پر بھرپور توجہ دے رہے ہیں۔