چیمپینز ٹرافی: آئی سی سی اور بورڈ ممبرز میں اتفاق ہو گیا

انٹرنیشنل کرکٹ کونسل (آئی سی سی) نے چیمپئنز ٹرافی 2025 کے حوالے سے جاری تعطل کو حل کرتے ہوئے “پاک بھارت فیوژن فارمولے” کا اعلان کیا ہے۔

آئی سی سی کے بورڈ نے اس فارمولے کی منظوری دے دی ہے، جو چیمپئنز ٹرافی، ویمن ورلڈ کپ اور ٹی ٹوئنٹی ورلڈ کپ پر لاگو ہوگا۔اس معاہدے کے مطابق، چیمپئنز ٹرافی کے 8 ٹیموں کے ایونٹ میں بھارت کے میچز غیر جانبدار مقام پر کھیلے جائیں گے۔

اس کے بدلے میں آئی سی سی کے دیگر ایونٹس، جن کی میزبانی بھارت کرے گا، وہ بھی نیوٹرل وینیو پر کھیلے جائیں گے۔ آئی سی سی چیمپئنز ٹرافی کا شیڈول جلد جاری کر دیا جائے گا۔

آئی سی سی کے مطابق پاکستان 4 سال بعد ایک اور آئی سی سی ایونٹ کی میزبانی کرے گا، جس میں 2028 کے ویمن ٹی ٹوئنٹی ورلڈ کپ کی میزبانی پاکستان کو دی جائے گی۔ 2028 ویمن ٹی ٹوئنٹی ورلڈ کپ اگلے سائیکل کا پہلا آئی سی سی ایونٹ ہوگا، اور اس میں بھی پاکستان بھارت کا فیوژن فارمولہ اپلائی ہوگا، جس میں ناک آؤٹ میچز بھی شامل ہوں گے۔

اس کے علاوہ 2027 تک پاکستان اور بھارت کے درمیان آئی سی سی ایونٹس کے میچز نیوٹرل وینیو پر کھیلے جائیں گے، اور نیوٹرل وینیو کا انتخاب میزبان بورڈ کرے گا۔

واضح رہے کہ بھارت 2025 میں ویمن ورلڈ کپ اور 2026 میں مینز ٹی ٹوئنٹی ورلڈ کپ کی میزبانی کرے گا، جبکہ پاکستان اور بھارت کے درمیان معاہدے کو آئی سی سی بورڈ سے باضابطہ منظوری دی جائے گی۔