فوجی عدالت سے سویلینز کے خلاف سزاؤں کو مسترد کرتے ہیں، عمر ایوب

اسلام آباد: تحریک انصاف کے رہنما اور قائد حزب اختلاف قومی اسمبلی عمر ایوب خان نے ملٹری کورٹس سے سزاؤں کے اعلان پر شدید ردعمل ظاہر کرتے ہوئے ان سزاؤں کو مسترد کر دیا ہے۔

عمر ایوب خان نے اپنی ٹویٹ میں کہا کہ ہم فوجی عدالتوں کی جانب سے پی ٹی آئی کے زیر حراست افراد کے خلاف سنائی گئی سزاؤں کو انصاف کے اصولوں کے منافی سمجھتے ہیں۔ انہوں نے کہا کہ زیر حراست افراد عام شہری ہیں اور ان پر فوجی عدالتوں میں مقدمہ نہیں چلایا جا سکتا۔

یہ بھی پڑھیں: 9 مئی میں ملوث 25مجرمان کو سزائیں سنا دی گئیں

عمر ایوب خان نے مزید کہا کہ فوجی عدالتیں جو عام شہریوں کو سزائیں سناتی ہیں، وہ بنیادی طور پر کینگرو عدالتیں ہیں۔ ان کا کہنا تھا کہ “فوجی عدالتیں قانونی طور پر ریاست کی عدالتی طاقت کی شراکت دار نہیں ہو سکتیں، کیونکہ مسلح افواج ریاست کے انتظامی اختیار کا حصہ ہیں۔

انہوں نے کہا کہ ایسی عدالتوں کا قیام عام شہریوں سمیت عدلیہ کی آزادی کے خلاف ہے اور ایسے فیصلوں سے آئین کی بنیادی خصوصیت طاقت کی تقسیم کی نفی ہوتی ہے۔