پشاور ہائیکورٹ نے 24 نومبر کو ڈی چوک میں تحریک انصاف کے احتجاج کے بعد درج ہونے والے مقدمات میں پارٹی کے 140 سے زائد رہنماؤں، ارکان اسمبلی اور کارکنوں کی راہداری اور حفاظتی ضمانت کی درخواستیں منظور کرلی ہیں۔
نجی ٹی وی کو اپنی رپورٹ میں بتانا ہے کہ 28 نومبر سے اب تک پی ٹی آئی کے رہنماؤں اور اراکین اسمبلی کی 140 سے زائد درخواستوں پر صوبائی عدالت میں سماعت ہوئی، 70 سے زائد راہداری ضمانت اور 69 حفاظتی ضمانت درخواستوں پرعدالت عالیہ میں سماعت ہوئی۔
کورٹ نے تمام درخواست گزاروں کو راہداری اور حفاظتی ضمانتیں دے دی ہیں۔ حفاظتی اور راہداری ضمانت حاصل کرنیوالوں میں چیف منسٹرخیبرپختونخوا علی امین گنڈاپور بھی شامل ہیں۔
پی ٹی آئی کے تمام سینئر رہنماؤں نے ہائی کورٹ سے راہداری ضمانت اور مقدمات کی تفصیل کیلئے رجوع کیاتھا۔ پی ٹی آئی سیکرٹری جنرل سلمان اکرم راجا، اپوزیشن لیڈرعمر ایوب نے راہداری اور حفاظتی ضمانت حاصل کرلی ہے۔
بانی پارٹی کی اہلیہ بشریٰ بی بی کو بھی 16 جنوری تک حفاظتی ضمانت مل گئی۔رکن قومی اسمبلی اسد قیصر، شبلی فراز، شیخ وقاص اکرم، شیرافضل مروت، جنید اکبر بھی حفاظتی ضمانت کیلئے ہائیکورٹ پیش ہوئے جبکہ رکن قومی اسمبلی شہریار آفریدی، عاطف خان، شہرام ترکئی، عادل بازئی، انور تاج، فیصل امین و دیگر نے بھی حفاظتی ضمانت حاصل کی ہے۔
ان کے علاوہ حفاظتی ضمانت حاصل کرنے والوں میں صوبائی وزراء آفتاب عالم، فیصل ترکئی، سہیل آفریدی اور دیگربھی شامل ہیں۔ شاندانہ گلزار، زرتاج گل، ثریا بی بی، سینیٹر فلک ناز، کنول شوزب، عالیہ حمزہ، صنم جاوید، خدیجہ شاہ، مشال یوسفزئی، حمیدہ شاہ کو بھی پشاور ہائیکورٹ نے راہداری اور حفاظتی ضمانتیں دی ہیں۔
By 
