ملٹری کورٹس سے سزائیں آئین وقانون کے مطابق ہوئی ہیں، رانا ثنا اللہ

سابق وزیرداخلہ رانا ثنا اللہ خان نے کہا ہے کہ پاکستان تحریک انصاف (پی ٹی آئی) کے مطالبات حل کرنا آسان نہیں ہوگا، اور نومئی کے واقعات سے متعلق اسٹیبلشمنٹ سے بات چیت کی جائے گی۔

ایک نجی ٹی وی پروگرام میں گفتگو کرتے ہوئے انہوں نے کہا کہ پی ٹی آئی اور حکومتی وفد کی دو یا تین ملاقاتوں کے بعد یہ بات واضح ہو جائے گی کہ کوئی پیشرفت ہو رہی ہے یا نہیں۔ انہوں نے مزید کہا کہ جن عالمی معاہدوں پر دستخط کئے گئے ہیں، ان میں ملٹری کورٹس سے متعلق کوئی غیر قانونی بات نہیں ہے، کیونکہ پاکستان میں مارشل لا نہیں ہے اور آئین کے تحت ملٹری کورٹس کو یہ اختیارات دیے گئے ہیں۔

یہ بھی پڑھیں: 2025 کیلئے ہونڈا 125 کے تمام ویرینٹس کی قیمتیں سامنے آگئیں

ایک سوال کے جواب میں رانا ثنا اللہ کا کہنا تھا کہ ملٹری تنصیبات پر حملہ کرنے والوں کے ٹرائل ملٹری کورٹس میں ہوتے ہیں اور ان سزاؤں پر تنقید کرنے والے ممالک کو یہ وضاحت دینی چاہیے کہ ملٹری کورٹس سے سزائیں آئین اور قانون کے مطابق دی جا رہی ہیں۔

سیاست کے حوالے سے ایک سوال پر رانا ثنا اللہ نے کہا کہ پاکستان میں گھٹیا سیاست کا آغاز 2014 کے دھرنوں سے ہوا تھا، جس کے ذریعے انتشار اور افراتفری کی سیاست پھیلائی گئی، اور یہ ایک ہی طریقہ کار اور ذہنیت کا نتیجہ ہے۔