گوادر کا نیا ائرپورٹ پاک چین دوستی کی عظیم مثال ہے، شہبازشریف

اسلام آباد: وزیراعظم شہباز شریف نے کہا ہے کہ گوادر کا نیا بین الاقوامی ہوائی اڈہ چین اور پاکستان کی عظیم دوستی کا ایک نمایاں اظہار ہے۔ انہوں نے اس بات کا اعتراف کیا کہ بین الاقوامی معیار کے مطابق جدید سہولتوں سے آراستہ یہ ایئرپورٹ علاقے میں خوشحالی لائے گا اور روزگار کے نئے مواقع پیدا کرے گا۔

وزیراعظم نے نیو گوادر انٹرنیشنل ایئرپورٹ سے متعلق ایک اجلاس کی صدارت کی، جس میں انہیں بتایا گیا کہ ایئرپورٹ کو ایک مصروف ٹرانزٹ پوائنٹ بنانے کے لیے حکمت عملی تیار کی جا رہی ہے۔ وزیراعظم نے اس کے علاوہ گوادر ایئرپورٹ کے ساتھ بلوچستان کے دیگر علاقوں کو جوڑنے والی سڑکوں کے نظام کو بہتر بنانے کی ہدایت دی۔ انہوں نے ایئرپورٹ کے لیے فول پروف سیکیورٹی انتظامات بھی کرنے کا حکم دیا۔

اجلاس میں بتایا گیا کہ نیو گوادر انٹرنیشنل ایئرپورٹ رقبے کے لحاظ سے پاکستان کا سب سے بڑا ہوائی اڈہ ہے، جو A-380 طیاروں کو ہینڈل کرنے کی صلاحیت رکھتا ہے۔ ایئرپورٹ کی سالانہ مسافر گنجائش 4 لاکھ ہے، اور پاکستان ائیرپورٹ اتھارٹی نے ایروڈرم سرٹیفکیٹ جاری کر دیا ہے، جبکہ پاکستان کسٹمز نے بھی اس ایئرپورٹ کو نوٹیفائی کر دیا ہے۔

مزید بتایا گیا کہ ایئرپورٹ پر مختلف اداروں جیسے پاکستان ائیرپورٹ اتھارٹی، ائیرپورٹ سیکیورٹی فورس، پاکستان کسٹمز، اینٹی نارکوٹکس فورس اور دیگر متعلقہ اداروں کا عملہ تعینات کر دیا گیا ہے۔

ایئرپورٹ سے مسقط کے لیے پروازیں 10 جنوری 2024 سے شروع ہو جائیں گی، اور پاکستانی نجی ایئرلائینز اور دیگر بین الاقوامی ایئرلائینز کے ساتھ بات چیت جاری ہے تاکہ ملکی اور بین الاقوامی فلائٹ آپریشنز شروع کیے جا سکیں۔

ایئرپورٹ کی سہولتوں میں کولڈ سٹوریج، وئیر ہاؤسز، کورئیر سروسز، کارگو شیڈز، تکنیکی گراؤنڈ سپورٹ، فیول فارمز، ہوٹیلز اور شاپنگ مالز کے لیے جگہ مختص کی گئی ہے۔ ایئرپورٹ پر بینک برانچز اور اے ٹی ایم مشینوں کی تنصیب کے حوالے سے اسٹیٹ بینک آف پاکستان سے رجسٹرڈ تمام بینکوں سے رابطہ کیا گیا ہے۔

گوادر ایئرپورٹ کے بہتر سڑک رابطے کے لیے ایسٹ بے ایکسپریس وے کا پہلا حصہ مکمل ہو چکا ہے، اور دوسرے حصے کی فیزیبیلٹی تیار کی جا رہی ہے۔ اجلاس میں وفاقی وزیر دفاع و ہوا بازی خواجہ محمد آصف، وفاقی وزیر قانون و انصاف اعظم نذیر تارڑ، وفاقی وزیر اقتصادی امور احد خان چیمہ، وفاقی وزیر خزانہ و محصولات محمد اورنگزیب اور دیگر اعلیٰ حکومتی افسران نے شرکت کی۔ نائب وزیراعظم اسحاق ڈار اور وفاقی وزیر عبدالعلیم خان نے ویڈیو لنک کے ذریعے اجلاس میں شرکت کی۔