پنجاب میں آج بھی دھند کا راج ، موٹرویز مختلف مقامات پر بند

پنجاب کے مختلف شہروں میں آج بھی دھند کا راج برقرار ہے، حد نگاہ انتہائی کم ہونے کے باعث موٹر ویز کو مختلف مقامات سے بند کیا گیاہے۔

ترجمان موٹر وے پولیس کے مطابق دھند کے باعث موٹر وے ایم 2 لاہور سے کوٹ مومن، ایم 3 فیض پور سے سمندری تک بند ہے جبکہ لاہور سیالکوٹ موٹر وے ایم 11 پر بھی ٹریفک کا داخلہ ممنوع ہے۔

قومی شاہراہوں پر بھی دھند کے باعث حد نگاہ کم ہونے پر ڈرائیورز کو مشکلات کا سامنا ہے۔

ترجمان موٹر وے پولیس کا کہنا ہے کہ ڈرائیور حضرات دھند میں گاڑیوں پر فوگ لائٹس کا استعمال یقینی بنائیں، اگلی گاڑی سے مناسب فاصلہ رکھیں اور تیزی سے لین تبدیل نہ کریں، شہریوں کو غیر ضروری سفر سے گریز کرنا چاہیے۔

یہ بھی پڑھیں : 12 دنوں میں مذاکرات ایک انچ بھی آگے نہیں بڑھے: عرفان صدیقی

اس کے علاوہ دھند کے باعث فلائٹس آپریشن بھی متاثر ہے، کئی پروازیں تاخیر کا شکار ہیں جس سے عوام کو پریشانی کا سامنا کرنا پڑ رہا ہے۔

دوسری جانب آج صبح لاہور میں بوندا باندی کے باعث سردی کی شدت میں اضافہ ہوگیا، محکمہ موسمیات کے مطابق صوبائی دارالحکومت لاہور میں آج وقفے وقفے سے بارش برسنے کا سلسلہ جاری رہے گا۔

محکمہ موسمیات کے مطابق  آج (اتوار)  کے روز ملک کے بیشتر علاقوں میں بارش اور برفباری کا امکان ہے، رپورٹ کے مطابق شمالی بلوچستان، خیبر پختونخوا ، بالائی پنجاب،خطہ پوٹھوہار ،اسلام آباد ،گلگت بلتستان، کشمیر ، مری اور گلیات میں بارش اور پہاڑوں پر برفباری متوقع ہے۔

پنجاب کے زیادہ تر میدانی علاقوں اور بالائی سندھ میں صبح، رات کے اوقات میں درمیانی سے شدید دُھند چھائے رہنے کا بھی امکان ہے۔