پنجاب میں ڈرائیونگ لائسنس کا اجراء ٹریفک پولیس کے اختیار میں ہے اور کسی بھی گاڑی کو سڑک پر چلانے سے پہلے ڈرائیونگ لائسنس حاصل کرنا قانونی طور پر ضروری ہے۔
ٹریفک قوانین کی خلاف ورزی یا بغیر لائسنس کے گاڑی چلانے پر ٹریفک پولیس چالان کر سکتی ہے۔ ڈرائیونگ لائسنس صرف ان افراد کو جاری کیا جاتا ہے جو سڑک کے نشانات اور عملی ٹیسٹ کامیابی سے پاس کرتے ہیں۔
جنوری 2025 کے لیے مختلف اقسام کے ڈرائیونگ لائسنس کی فیسیں سامنے آگئی ہیں۔ موٹرسائیکل ڈرائیونگ لائسنس کی فیس ایک سال کے لیے 930 روپے رکھی گئی ہے جبکہ ٹیسٹ فیس 50 روپے ہوگی۔ رکشہ ڈرائیونگ لائسنس کی فیس 880 روپے اور ٹیسٹ فیس 100 روپے ہےجبکہ کار ڈرائیونگ لائسنس کے لیے فیس 1,830 روپے ہے اور اس کی ٹیسٹ فیس 150 روپے مقرر کی گئی ہے۔
ٹریفک پولیس کی جانب سے یہ اعلان شہریوں کی سہولت کے لیے کیا گیا ہے تاکہ وہ بروقت اپنے درخواستیں جمع کر سکیں اور قانونی طور پر ڈرائیونگ کر سکیں۔ لائسنس کے اجراء کا مقصد سڑکوں پر محفوظ ڈرائیونگ کو یقینی بنانا اور حادثات کی شرح کو کم کرنا ہے۔
درخواست دینے کے لیے شہریوں کو بعض ضروری دستاویزات فراہم کرنا ضروری ہیں، جن میں قومی شناختی کارڈ (CNIC) کی کاپی، پاسپورٹ سائز کی 3 تصاویر، میڈیکل سرٹیفکیٹ (مجاز ڈاکٹر سے جاری شدہ)، 50 سال یا اس سے زائد عمر کے افراد کے لیے میڈیکل فٹنس سرٹیفکیٹ، درخواست فارم (A)، اور اصل لرنر پرمٹ شامل ہیں۔
ان دستاویزات کے ساتھ درخواست جمع کرانے کے بعد شہری قانونی طور پر ڈرائیونگ کر سکتے ہیں۔
By 
