برسلز میں پارلیمنٹ کے باہر پاکستان، پاک فوج زندہ باد ریلی کا انعقاد

برسلز: سپین کے شہر باسلونا اور اٹلی کے شہر بریشیا کے بعد آج بیلجیئم کے دارالخلافہ برسلز میں شدید سردی اور منفی پانچ درجہ حرارت میں دنیا کی سب سے بڑی پارلیمنٹ کے باہر غیور پاکستانیوں نے پاکستان زندہ باد، پاک فوج زندہ باد ریلی کا انعقاد اور عظیم الشان مظاہرہ کیا۔

ریلی میں شریک اوورسیز نےسبز ہلالی پرچم تھامے غیور پاکستانیوں نکلو سپہ سالار کی خاطر، تیرا ضمیر میرا ضمیر، عاصم منیر عاصم منیر، کے فلک شگاف نعرے لگا کر پاک فوج کے ساتھ اپنی محبت کا بھر پور مظاہرہ کیا۔ اوورسیز پاکستانیوں نے کہا کہ وہ پاک فوج کی قیادت کے ساتھ جم کر کھڑے ہیں اور پاک فوج کے خلاف ہر فتنے کو شکست دیں گے۔ اس ریلی کی قیادت علی چوہدری ، صدر ای یو پاک فرینڈ شپ فیڈریشن یوتھ ونگ یورپ اور پاکستانی نژاد ممبر پارلیمنٹ چوہدری محمد علی لوہسر نے کی۔

اس ریلی کی خاص بات پورے بیلجیئم سےجوق در جوق آئے ہوئے 10 سال کے بچوں سے لیکر 80 سال کے بزرگ اوورسیز پاکستانیوں نے بھرپور شرکت کی اور غیور پاکستانیوں کا اپنے وطن اور فوج کے کیلئے جوش و جذبہ اور ولولہ دیدنی تھا۔ انہوں نے اس موقع پر کہا کہ وہ سب پاکستانی پاک فوج اور سپہ سالار کے ساتھ کھڑے ہیں اور سب نے یک زبان ہو کر سول نافرمانی نامنظور نامنظور کے فلک شگاف نعرے لگائے۔

اس ریلی میں بلجییم سے سٹوڈنٹس ، بزنس کمیونٹی اور دوسرے مکتبہ فکر سے تعلق رکھنے والے لوگوں نے بڑھ چڑھ کر شرکت کی اور اس عزم کا اعادہ کیا کہ وہ سب پاکستان کے خلاف اور افواج پاکستان کے خلاف کی جانے والی زبان درازی کو سختی کے ساتھ بند کریں گے۔ اس موقع پر اوورسیز پاکستانیوں نے آرمی چیف جنرل آصف منیر کی قد آور تصاویر اٹھا رکھی تھیں اور ہر طرف سبز ہلالی پرچم کی بہار تھی۔

چئرمین ای یو پاک فرینڈ شپ فیڈریشن یورپ چوہدری پرویز اقبال لوہسر نے اس موقع پر کہا کہ یورپ بھرسےشروع ہونے والی ریلیوں کا یہ سلسلہ ہوتا ہوا آج برسلز میں پہنچا ہے جس کے بعد اب انگلینڈ، آسٹریلیا اور امریکہ تک ان ریلیوں کا انعقاد کیا جائے گا۔
اس ریلی میں خصوصی طور پر ہالینڈ سے چوہدری بشیر، شاہد بٹ، بلجئیم سے شیخ ماجد ، نعیم ڈار ، بشارت چوہان، انعام اللہ بھٹی، راجہ حسن ، وقاص بٹ، کشمیری رہنما قمر عباسی اور بزنس کمیونٹی نے خصوصی شرکت کی۔