روزنامہ اوصاف کے چیف رپورٹر اور سینئر صحافی جاوید شہزاد انتقال کر گئے ۔ سینئر صحافی جاوید شہزاد حرکت قلب بند ہونے کے باعث دنیائے فانی سے رحلت فرما گئے ۔
ان کی نماز جنازہ کل صبح 11 بجے چوہڑ چوک قبرستان راولپنڈی میں ادا کی جائے گی ۔صدر مملکت آصف علی زرداری نے اوصاف گروپ سے وابستہ سینئر صحافی جاوید شہزاد کی وفات پر گہرے دکھ اور افسوس کا اظہار کیا ہے۔ صدر نے مرحوم جاوید شہزاد کی صحافتی خدمات کو خراج تحسین پیش کیا اور مرحوم صحافی کے اہل خانہ کیساتھ اظہار ہمدردی کی ۔ صدر مملکت کی جانب سے جاوید شہزاد کے لئےدعائے مغفرت اور ورثاء کیلئے صبر جمیل کی دعا کی گئی ۔
ادھر وزیراعظم شہباز شریف نے بھی جاوید شہزاد کے انتقال پر گہرے افسوس کا اظہار کیا ہے۔ وزیراعظم نے مرحوم جاوید شہزاد کی بلندی درجات کیلئے خصوصی دعا کی اور مرحوم کے اہل خانہ سے تعزیت کا اظہار کیا۔ شہباز شریف نے کہا کہ جاوید شہزاد کی پاکستان میں جرنلزم اور میڈیا کے شعبوں میں خدمات کو مدتوں یاد رکھا جائے گا ۔
دوسری طرف وفاقی وزیر اطلاعات عطاءاللہ تارڑ نے سینئر صحافی جاوید شہزاد کے انتقال پر اظہار افسوس کیا ، مرحوم کے لواحقین سے دلی تعزیت کی ۔ عطا ءاللہ تارڑ نے کہا کہ جاوید شہزاد کے انتقال کی خبر سن کر دلی افسوس ہوا، مرحوم کی شعبہ صحافت کیلئے خدمات کو ہمیشہ یاد رکھا جائے گا، سوگوار خاندان کے دکھ میں برابر کے شریک ہیں ، اللہ تعالیٰ مرحوم کو اپنے جوار رحمت میں جگہ اور لواحقین کو صبر جمیل عطا فرمائے۔ آمین
چیئرمین پی ٹی آئی بیرسٹر گوہر ، سلمان اکرم راجہ اور شیخ وقاص اکرم نے سینئر صحافی جاوید شہزاد کی رحلت کو نہایت صدمہ انگیز قرار دیا اور ان کے ادارے اور اہلِ خانہ سے دلی ہمدردی اور تعزیت کا اظہار کیا ہے۔ اپنے تعزیتی بیان میں پاکستان تحریک انصاف کی قیادت کا کہنا ہے کہ جاوید شہزاد بہترین انفرادی اور پیشہ وارانہ خواص کے حامل تھے جن کا شمار صفِ ا ول کے نامہ نگاروں اور رپورٹرز میں ہوتا تھا۔ جاوید شہزاد کے اچانک وصال سے پیشہ وارانہ رپورٹنگ کے شعبے میں ایک بڑا خلاء پیدا ہوا ہے جسے مدتوں پُر نہ کیا جا سکے گا۔
بطور بیٹ رپورٹر جاوید شہزاد نے محنت، دیانت اور معروضیت کے اعلیٰ معیارات ہی کو اپنے طریقۂ کار کی بنیاد بنائے رکھا اور شخصی اور طبعی میلانات پر پیشہ وارانہ دیانت اور امانت ہی کو فوقیت دی۔ بطور صحافی جاوید شہزاد کی صحافت، ملک و قوم کیلئے خدمات ہر لحاظ سے گرانقدرہیں جنہیں ہمیشہ یاد رکھا جا ئیگا۔ رب ذوالجلال پسماندگان کو اس صد مے کو برداشت کرنے کی ہمت عطا فامائے اور انہیں صبر جمیل کی دولت سے نوازیں۔ سوگ اور دکھ کی ان گھڑیوں میں پاکستان تحریک انصاف کی قیادت اور کارکنان جاوید شہزاد مرحوم کے لواحقین کے ساتھ ان کے غم میں برابر کے شریک ہیں ۔
By 
