القادر ٹرسٹ کا ممکنہ فیصلہ اور حکومتی وزراء کے بیانات، رہنما پی ٹی آئی اسد قیصر کا ردِ عمل

رہنما  پاکستان تحریک انصاف اسد قیصر نے کہا ہے کہ القادر ٹرسٹ کا فیصلہ کل آنا ہے، تاہم حکومتی وزرا آج سےہی بیانات دے رہے ہیں۔

تفصیلات کے مطابق رہنما پی ٹی آئی اسد قیصر نے نجی ٹی ویپروگرام میں گفتگو کرتے ہوئے کہنا تھا کہ القادر ٹرسٹ کا فیصلہ کل آنا ہے تمام وزرا آج ہی بیانات دے رہے ہیں،اس کا مطلب ہے وزرا کو فیصلے بارے پتہ ہے، ملک میں انصاف کےنظام کا اللہ ہی حافظ ہے ۔

اسد قیصر نے کہا کہ ہم چاہتےہیں بانی سمیت تمام اسیران کی رہائی ہوں، جوڈیشل کمیشن کے بغیر مذاکرات کا کوئی فائدہ نہیں ہو گا، بانی کی مشاورت سےہی آگے بڑھیں گے۔ رہنما تحریک انصاف کا کہنا تھا کہ کل ہم نےایک بجےمیٹنگ بلائی ہے، ہمیں پتہ ہے یہ کل سزا سنائیں گے، سزا کےخلاف احتجاج اور تمام اسمبلیوں میں آوازاٹھائیں گے، سزا کے خلاف پورے ملک میں احتجاج کریں گے۔

اسد قیصرنے کہا کہ حکومت کے پاس بہترین موقع ہے مذاکرات سے فائدہ اٹھائے، ہمارا آزاد جوڈیشل کمیشن بنانےکا مطالبہ ہے، جدوجہد میں اتارچڑھاؤ آتے رہتے ہیں، فیصل واوڈا بیچارے کے بیانات کی کوئی حیثیت نہیں ہے۔ ان کا کہنا تھا کہ ہم مزاحمت کی طرف بڑھیں گے ناکوں چنےچبوائیں گے، یہ ایک لمبی جدوجہد ہے، ہم آئینی وقانونی جدوجہد جاری رکھیں گے، مذاکرات ایک الگ اورسزا کا معاملہ الگ ہے۔

رہنما تحریک انصاف نے مزید کہا کہ ہم انصاف مانگ رہے ہیں، ڈیل نہیں، کل کے فیصلے کی کوئی قانونی اہمیت نہیں ہو گی، جوبات ہوگی اسی مذاکراتی کمیٹی میں ہو گی، بیک ڈور مذاکرات نہیں ہو رہے ہیں۔