حکومت اور پی ٹی آئی کے درمیان کوئی ڈیل نہیں ہورہی، علیمہ خان

راولپنڈی: عمران خان کی بہن علیمہ خان نے کہا ہے کہ عمران خان کے خلاف فیصلہ سنانے والے جج ان کی آمد سے پہلے عدالت چھوڑ کر چلے گئے۔

علیمہ خان نے آزاد ڈیجیٹل سے گفتگو کرتے ہوئے کہا کہ جج کے ریمارکس تھے کہ ملزمان کی عدم موجودگی کی وجہ سے کیس کا فیصلہ موخر کر دیا گیا ہے۔

یہ بھی پڑھیں:پی ٹی آئی نے مذاکرات کے حوالے سے ہمیں اعتماد میں نہیں لیا، مولانا فضل الرحمٰن

علیمہ خان نے وضاحت کی کہ جج صاحب نے ہمیں ساڑھے 10 بجے کا وقت دیا تھا جبکہ وکلا کو 11 بجے کا وقت دیا گیا تھا، لیکن جج صاحب خود وقت سے پہلے ہی عدالت چھوڑ گئے۔ انہوں نے کہا کہ کبھی کبھار جج ایک یا دو گھنٹے تک انتظار کرتے ہیں، لیکن آج اتنے اہم دن کے باوجود جج صاحب جلدی چلے گئے۔ علیمہ خان نے جج صاحب کی جانب سے کیس موخر کرنے کو ایک بہانہ قرار دیتے ہوئے کہا کہ ہم اس پر کچھ نہیں کہہ سکتے۔

جب ان سے حکومت اور پی ٹی آئی کے درمیان کسی ڈیل کے حوالے سے سوال کیا گیا تو علیمہ خان نے واضح طور پر کہا کہ ڈیل کے حوالے سے وضاحتیں دیتے دیتے ہم بھی تھک گئے ہیں اور میڈیا بھی اس لفظ کو گھما پھرا کر قوم کو گمراہ کر رہا ہے۔ انہوں نے مزید کہا کہ ڈیل کا مطلب ہے کہ دو فریقوں کے درمیان کسی مسئلے پر مصلحت کے ساتھ بات چیت کی جاتی ہے، لیکن عمران خان نے جوڈیشل کمیشن بنانے کا مطالبہ کیا تھا اور دوسری طرف سے کوئی مطالبہ نہیں آیا، لہذا بات کیسے آگے بڑھے گی۔