پی ٹی آئی کے دو بڑے کھلاڑی کمپرومائزڈ ہیں جو چاہتے ہیں عمران خان جیل میں رہیں: سینیٹر فیصل واؤڈا

سابق وفاقی وزیر سینیٹر فیصل واؤڈا نے کہا ہے کہ پی ٹی آئی کے دو بڑے کھلاڑی ہیں جو کمپرومائزڈ ہیں اور چاہتے ہیں کہ بانی پی ٹی آئی عمران خان جیل میں ہی رہیں۔

تفصیلات کے مطابق سابق وفاقی وزیر سینیٹر فیصل واؤڈا نے نجی ٹی وی پروگرام میں گفتگو کرتے ہوئے کہا ہے کہ 190 ملین پاؤنڈ کیس میں اختیارات کا غلط استعمال کیا گیا ہے سزا تو ملے گی۔ سینیٹر فیصل واوڈا نے کہا کہ انصاف ہورہا ہے تو اس کی تعریف کرنی چاہیے، ملٹری کورٹس سے سزاؤں کے باوجود لوگوں کو بری کیا گیا ہے تو تعریف کرنی چاہیے۔انہوں نے کہا کہ 190 ملین پاؤنڈ، 9 مئی، 26 نومبر کے کیسز حقیقت میں موجود ہیں۔

ایک سوال کے جواب میں انہوں نے کہا کہ پی ٹی آئی کے دو بڑے کھلاڑی ہیں جو کمپرومائزڈ ہیں چاہتے ہیں کہ بانی جیل میں ہی رہیں۔ فیصل واوڈا نے کہا کہ شہبازشریف کے ذاتی طور پر تعلقات اسٹیبلشمنٹ کیساتھ اچھے ہیں، ایس آئی ایف سی کو آرمی چیف لیڈ کر رہے ہیں جو بہترین کام کررہی ہے اگر حکومت کچھ کریڈٹ لے رہی ہے تو لینےدیں اس میں غلط کیا ہے۔

انہوں نے کہا کہ دوہزار پچیس میں پاکستان کے لیے بہت خوشخبریاں ہوں گی، پاکستان کے لیے ٹیک آف کا سال ہوگا، حکومت اور پی ٹی آئی میں مذاکرات بالکل شروع ہوں گے لیکن بیس جنوری کے بعد ہوں گے۔فیصل واوڈا نے مزید کہا کہ جوڈیشل کمیشن کا قیام ممکن نہیں کیونکہ حکومت 2014 کےدھرنوں پرچلی جائے گی۔