حکومتِ پاکستان نے گزشتہ سال فریضہ حج ادا کرنے والے عازمین کو تقریباً 40 ہزار روپے واپس کرنے کا اعلان کردیا۔
وفاقی وزیر مذہبی امور چودھری سالک نے نجی ٹی وی سے گفتگو کرتے ہوئے بتایا کہ عازمین حج کو یہ رقم مختلف کیٹیگریز کے حساب سے واپس کی جائے گی اور ہر حاجی کو تقریباً 40 ہزار روپے تک واپس ملیں گے۔
انہوں نے مزید کہا کہ اس سال عازمین کو اتنی ہی رقم میں زیادہ سہولتیں فراہم کی جائیں گی۔ وزیر موصوف کا کہنا تھا کہ منی میں اس سال عازمین کو اضافی سہولتیں دی جائیں گی اور حج کے دوران انہیں تین وقت کا کھانا فراہم کیا جائے گا۔
اس کے علاوہ منی میں حج کے دوران حجاج کو روم کولر کی بجائے ایئر کنڈیشنڈ فراہم کیے جائیں گے اور گزشتہ سال کی طرح کپڑوں کے خیموں کی بجائے جپسم کے بنے خیمے دیے جائیں گے۔ سب سے بڑی سہولت، جو اس سال عازمین کو ملے گی، وہ’روڈ ٹو مکہ‘ پروگرام کی سہولت ہوگی، جس سے عازمین کو سعودی عرب پہنچنے سے پہلے پاکستان میں ہی کچھ ضروری عملوں کی تکمیل کی سہولت ملے گی۔
By 
