پنجاب کے طلبا کیلئے لیپ ٹاپ اسکیم سے متعلق اہم خبر آگئی

پنجاب حکومت نے وزیر اعلیٰ لیپ ٹاپ اسکیم 2025 کا اعلان کیا جس کا مقصد ذہین اور محنتی طلباء کو جدید ٹیکنالوجی فراہم کرنا ہے تاکہ وہ اپنی تعلیمی کارکردگی کو مزید بہتر بنا سکیں اور عالمی معیار کی تعلیم میں حصہ لے سکیں۔

وزیر اعلیٰ لیپ ٹاپ اسکیم 2025 اسکیم کے تحت حکومت نے 50,000 جدید لیپ ٹاپ تقسیم کرنے کا فیصلہ کیا ہے، جس میں ہر سال 2,000 لیپ ٹاپ دیے جائیں گے۔ طلباء کو اس اسکیم میں شامل ہونے کے لیے آن لائن درخواست دینے کی ضرورت نہیں ہوگی کیونکہ تعلیمی ادارے خود ہی اہل طلباء کا ڈیٹا مرتب کریں گے جو بعد میں تصدیق کے لیے پنجاب ہائیر ایجوکیشن کمیشن (HEC) کو بھیجا جائے گا۔

مزید پڑھیں: آسان کاروبار سکیم کیلئے اپلائی کرنے کیلئے فیس کی تفصیلات سامنے آگئیں

اس کے بعد HEC منتخب طلباء کی حتمی فہرست جاری کرے گا جس کے مطابق لیپ ٹاپ تقسیم کیے جائیں گے۔ اس اسکیم کا رجسٹریشن عمل فروری 2025 سے شروع ہو گا اور لیپ ٹاپ کی تقسیم رمضان کے بعد اپریل یا مئی 2025 میں متوقع ہے۔ وزیر اعلیٰ مریم نواز نے اس ماہ کے آغاز میں اس بات کی تصدیق کی کہ لیپ ٹاپ کی پہلی کھیپ پاکستان پہنچ چکی ہے۔ یہ لیپ ٹاپ 13ویں جنریشن کور آئی 7 کے ہوں گے اور خاص طور پر طلباء کے لیے تعلیمی اور تحقیقی مقاصد کے لیے مفید ثابت ہوں گے۔

پنجاب حکومت کی اسکیم کے تحت یونیورسٹی کے طلباء کو 20,000، کالج کے طلباء کو 14,000، ٹیکنیکل اور زرعی کالج کے طلباء کو 4,000، اور میڈیکل اور ڈینٹل کالج کے طلباء کو 2,000 لیپ ٹاپ دیے جائیں گے۔ اس اسکیم میں جنوبی پنجاب کے طلباء کو کل لیپ ٹاپ کا 32% حصہ دیا جائے گا تاکہ اس علاقے کے طلباء کو بھی تعلیم کے میدان میں برابر کے مواقع فراہم کیے جا سکیں۔

اس اسکیم میں کمپیوٹر سائنس، میڈیسن، انجینئرنگ، سائنس، سوشل سائنسز، بزنس، زبانیں، ویٹرنری میڈیسن اور زراعت جیسے شعبوں میں تعلیم حاصل کرنے والے طلباء اہل ہوں گے۔ اس کے علاوہ اقلیتی طلباء اور وہ طلباء جو سیکنڈری اور ہائیر سیکنڈری اسکول امتحانات میں اعلیٰ کارکردگی کا مظاہرہ کرتے ہیں، انہیں بھی ترجیحی بنیادوں پر لیپ ٹاپ دیے جائیں گے۔

لیپ ٹاپ اسکیم کا مقصد نہ صرف تعلیمی معیار کو بلند کرنا ہے بلکہ یہ بھی یقینی بنانا ہے کہ مختلف شعبوں میں تعلیم حاصل کرنے والے طلباء کو ٹیکنالوجی کے ذریعے بہترین تعلیمی وسائل میسر آئیں۔ پنجاب حکومت کی اس اسکیم کے ذریعے طلباء کو عالمی سطح پر معیار کی تعلیم اور تحقیق کے لیے درکار وسائل فراہم کرنے کی کوشش کی جا رہی ہے تاکہ وہ نہ صرف اپنے ملک میں بلکہ عالمی سطح پر بھی نمایاں کامیابیاں حاصل کر سکیں۔