یومِ یکجہتیِ کشمیر، پاک افواج کا مقبوضہ جموں و کشمیر کی عوام کی غیر متزلزل حمایت کا اعادہ

یوم یکجہتی کشمیر کے پروقار موقع پر چیئرمین جوائنٹ چیفس آف سٹاف کمیٹی، سروسز چیفس، اور پاکستان کی مسلح افواج نے بھارتی غیر قانونی طور پر مقبوضہ جموں و کشمیر کے عوام کے لیے اپنی منصفانہ جدوجہد میں ان کی غیر متزلزل حمایت کا اعادہ کرتی ہیں۔ –

تفصیلات کے مطابق یومِ یکجہتیِ کشمیر کے موقع پر چیئرمین جوائنٹ چیفس آف سٹاف کمیٹی، سروسز چیفس، اور پاکستان کی مسلح افواج نے کہا ہےکہ ہم کشمیری عوام کے ناقابل تسخیر جذبے کو خراج تحسین پیش کرتے ہیں جنہوں نے کئی دہائیوں کے جبر، ریاستی سرپرستی میں ہونے والی بربریت اور انسانی حقوق کی سنگین خلاف ورزیوں کو برداشت کیا۔

پاکستان کی مسلح افواج نے جاری پیغام میں کہا کہ ظلم کے مقابلے میں ان کا غیر متزلزل عزم پوری قوم کے لیے حوصلے اور تحریک کا مینار ہے۔ پاکستان کی مسلح افواج مقبوضہ جموں و کشمیر میں انسانی حقوق کی جاری سنگین خلاف ورزیوں کی شدید مذمت کرتی ہے

جن میں ماورائے عدالت قتل، جبری گمشدگیاں اور من مانی حراستیں شامل ہیں۔ یہ خلاف ورزیاں بین الاقوامی قانون، انسانی ہمدردی کے اصولوں اور بنیادی انسانی حقوق کے لیے ہندوستان کی صریح بے توقیری کا ایک سخت الزام ہے۔

ہم عالمی برادری، انسانی حقوق کی عالمی تنظیموں اور اقوام متحدہ پر زور دیتے ہیں کہ وہ کشمیری عوام کی حالت زار کے ازالے کے لیے فوری اور فیصلہ کن اقدام کریں اور اقوام متحدہ کی سلامتی کونسل کی قراردادوں پر ان کی امنگوں کے مطابق عمل درآمد کو یقینی بنائیں۔

پاکستان کی مسلح افواج کشمیر کے منصفانہ کاز کے لیے اپنے عزم پر ثابت قدم ہیں اور پاکستان کی خودمختاری اور علاقائی سالمیت کے تحفظ کے لیے اپنے فرض میں پرعزم ہیں۔ ہم اپنے کشمیری بھائیوں کی آزادی اور وقار کے جائز حصول میں ان کے ساتھ کندھے سے کندھا ملا کر کھڑے ہیں۔