افغانستان کو چینی کی ریکارڈ برآمد، ملک میں چینی مہنگی ہو گئی

افغانستان کےلیے چینی کی برآمدات میں 4332 فیصد اضافہ ریکارڈ کیا گیا ہے جس کے سبب ملک میں اضافی پیداوار کے باوجود چینی کی قیمتوں میں سیزن میں ہی اضافہ ہوا ہے۔

تفصیلات کے مطابق وزارت تجارت نے واضح کیا ہے کہ کے جولائی تا جنوری افغانستان کو چینی برآمد 26 کروڑ 26 لاکھ 80 ہزار ڈالر رہی جب کہ گزشتہ سال اس عرصےمیں افغانستان کو چینی کی برآمد محض 59 لاکھ 30 ہزار ڈالرز تھی۔ سالانہ بنیادوں پر افغانستان کو چینی برآمد میں 25 کروڑ 67 لاکھ 60 ہزار ڈالرز اضافہ ہوا۔

افغانستان کو پاکستانی برآمدات میں سب سے زیادہ حصہ چینی کا ہے۔ گزشتہ 10 ہفتے کے دوران چینی کی اوسط قیمت 21 روپے 26 پیسے فی کلو بڑھی ہے۔ ملک میں چینی کی قیمت 160 روپے فی کلو تک ہے۔

وفاقی حکومت نے 2024 میں چینی کی برآمد کی اجازت دی تھی۔ جولائی تا اکتوبر ساڑھے 7 لاکھ میٹرک ٹن چینی برآمد کرنے کی منظوری دی گئی تھی۔ اکتوبر میں 5لاکھ میٹرک ٹن چینی برآمد کرنے کی منظوری دی گئی تھی۔