رمضان المبارک میں چینی کی قیمت میں اضافے کا امکان

 رمضان المبارک سے قبل ہی منافع خوروں نے تیاریاں کرلیں، حکومت کو چینی کی قیمت کم کرانے میں مشکلات کا سامنا ہے۔

میڈیا رپورٹ کے مطابق ذرائع کا بتانا ہے کہ حکومت کی گزشتہ ایک ماہ کی کوشش کے باوجودشوگر ملز چینی کی قیمت میں کمی پر تیار نہیں ہیں ، حکومت رمضان میں 120 روپے فی کلو میں چینی کی قیمت فروخت چاہتی ہے، اس وقت چینی کی سرکاری قیمت 155 روپے فی کلو ہے لیکن شوگر ملز کا مؤقف ہے کہ چینی کی فی کلو لاگت 170 روپے فی کلو ہے۔

ذرائع کے مطابق شوگر ملز نے حکومت سے چینی کی قیمت میں کمی کیلئے 18 فیصد جی ایس ٹی ختم کرنے کا مطالبہ کیا ہے، شوگر ملز مالکان کا کہنا ہے کہ جی ایس ٹی ختم ہونے سے چینی کی قیمت میں 25 روپے فی کلو کمی ہو سکتی ہے۔

یہ بھی پڑھیں : بجلی صارفین کے لیے خوشخبری ، کراچی سمیت ملک بھر میں بجلی سستی ہونے کا امکان

ذرائع کا کہنا ہے کہ شوگر انڈسٹری مالکان کی اکثریت دبئی میں ہیں، حکومت نے مالکان سے چینی کی قیمتوں میں کمی کیلئے جمعہ تک حتمی جواب مانگا ہے۔

ذرائع کا مزید کہنا ہے کہ چینی کی قیمت میں ایک روپے فی کلو کمی سے شوگر ملز کو ساڑھے 7 ارب کا نقصان ہو گا، جبکہ یوٹیلیٹی اسٹورز پر سبسڈی نہ دینے سے بھی حکومت کو مشکلات کا سامنا ہے۔

دوسری جانب گزشتہ روز وفاقی وزیر صنعت و پیداوار رانا تنویر حسین کی زیر صدارت پاکستان شوگر ملز ایسوسی ایشن کا اجلاس ہوا جس میں انہوں نے کہا تھا کہ ہر ضلع میں چینی کی تقسیم کے لیے مائیکرو پلان رواں ہفتے سامنے لایا جائے گا۔