خیبرپختونخوا حکومت کا ملازمین کو تنخواہیں اور پنشن قبل از وقت ادا کرنے کا فیصلہ

خیبرپختونخوا حکومت نے سرکاری ملازمین کو رمضان المبارک کے آغاز سے قبل ہی تنخواہیں اورپنشن ادا کرنے کا فیصلہ کرلیا۔

تفصیلات کے مطابق خیبرپختونخوا حکومت نے سرکاری ملازمین کو 28فروری تک تنخواہیں اور پنشن ادا کرنے کا فیصلہ کیا ہے۔ خیبرپختونخوا کے محکمہ خزان کی جانب سے جاری نوٹیفکیشن کے مطابق تمام سرکاری ملازمین کو ان کی تنخواہیں اور پنشن 28فروری کو مل جائیگی۔

محکمہ خزانہ نے صوبائی حکومت کی ہدایت پر تمام سرکاری محکموں کو مراسلہ جاری کیا ہے۔ مزید برآں یکم اور 2مارچ کو سرکاری تعطیلات کی وجہ سے ملازمین کو رمضان سے پہلے اپنے فنڈز تک رسائی کو یقینی بنانے کیلئے ایک دن پہلے ہی تنخواہیں ادا کی جائیگی۔

دوسری جانب خیبر پختونخوا کابینہ نے 10لاکھ غریب خاندانوں کے لئے رمضان و عید پیکیج کے لئے فنڈ کی منظوری دے دی۔ وزیراعلیٰ خیبرپختونخوا علی امین گنڈاپور نے ہدایت کی کہ غرباء، یتیموں اور ٹرانسجنڈرز کو شفاف طریقے سے پیکیج فراہم کیا جائے۔

اس کے علاوہ دہشتگردی سے متاثرہ غریب خاندانوں، غریب اور معذوروں کو اولین ترجیح کے طور پر پیکیج میں شامل رکھا جائے۔ وزیراعلیٰ کی جانب سے 15 رمضان سے پہلے پیکج کی تقسیم مکمل کرنے کی ہدایت کی گئی۔ وزیراعلیٰ نے خیبرپختونخوا کے سرکاری ملازمین کوتنخواہیں اور پنشن 25 فروری کو ادا کرنے کی ہدایت کی۔

اس کے علاوہ کابینہ اجلاس میں ایبٹ آباد پبلک سکول میں زیرِ تعلیم 15 یتیم طلبہ کے لئے 4.920 ملین روپے کی سالانہ گرانٹ منظور ی دی گئی۔ اجلاس میں ارباب نیاز کرکٹ سٹیڈیم کا نام عمران خان کرکٹ سٹیڈیم رکھنے کی منظوری بھی دیدی گئی۔ سپریم کورٹ کے فیصلے کی رو سے کیڈٹ کالج سوات فیز-III پروجیکٹ کے لیے زمین کی لاگت میں اضافے کے تحت فنڈز کی منظوری اور ایلیمنٹری اینڈ سیکنڈری ایجوکیشن فاؤنڈیشن کے 3687 اساتذہ کے تنخواہوں کے لئے 1028.673 ملین روپے جاری کرنے کی منظوری دی گئی۔

بس اڈوں کی بہتر انسپکشن کے لئے موٹر وہیکل رولز 1969 میں ترامیم منظورکر لی گئیں اورمحکمہ اوقاف کے لئے گرانٹ بھی منظور کی گئی۔ بی ایس نرسنگ گریجویٹس کے لئے ماہانہ 31000 روپے انٹرن شپ منصوبے کی منظوری اورسائنس، ٹیکنالوجی و آئی ٹی کے لئے خیبرپختونخوا گورنمنٹ رولز آف بزنس 1985 میں ترامیم منظورکی گئیں۔