پیٹرولیم مصنوعات کی قیمتوں میں نمایاں کمی کا امکان

پیٹرولیم مصنوعات کی قیمتوں میں نمایاں کمی کا امکان ہے۔

تفصیلات کے مطابق حکومت پیٹرولیم مصنوعات کی قیمتوں میں کمی پر غور کر رہی ہے۔ پیٹرول کی قیمت میں 50 پیسے فی لیٹر جبکہ ڈیزل کی قیمت میں 5 روپے 30 پیسے فی لیٹر تک کمی کی سفارش کی گئی ہے۔

پیٹرولیم مصنوعات کی قیمتوں میں کمی کا معاملہ وزارت خزانہ کو ارسال کیا جا چکا ہے، جس پر وزیراعظم شہباز شریف غور کرنے کے بعد حتمی فیصلہ کریں گے۔ وزیراعظم کی منظوری کے بعد وزارت خزانہ نئی قیمتوں کا نوٹیفکیشن جاری کرے گی۔

مزید پڑھیں: اوگرا نے ایل پی جی سستی کر دی

دوسری جانب متحدہ عرب امارات نے مارچ 2025 کے لیے پیٹرولیم مصنوعات کی نئی قیمتوں کا اعلان کر دیا ہے۔

خلیجی میڈیا کے مطابق، متحدہ عرب امارات کی فیول کمیٹی نے جمعہ کو مارچ 2025 کے لیے پیٹرول اور ڈیزل کی نئی قیمتیں جاری کی ہیں۔ سپر 98 پیٹرول کی قیمت 2.73 درہم فی لیٹر ہوگی، جو فروری میں 2.74 درہم فی لیٹر تھی۔

اسپیشل 95 کی قیمت 2.61 درہم فی لیٹر ہو گی، جو پچھلے مہینے 2.63 درہم فی لیٹر تھی۔ ای پلس زمرے کا پیٹرول 2.54 درہم فی لیٹر میں دستیاب ہوگا، جو فروری میں 2.55 درہم فی لیٹر تھا۔ ڈیزل کی قیمت 2.77 درہم فی لیٹر ہوگی، جو پچھلے مہینے 2.82 درہم فی لیٹر تھی۔ یہ اقدامات عوام کو ریلیف فراہم کرنے اور پیٹرولیم مصنوعات کی قیمتوں میں استحکام لانے کی کوششوں کا حصہ ہیں۔