آکسفورڈ یونیورسٹی مباحثے میں پی ٹی آئی نمائندے کو 184 ووٹوں کے ساتھ شکست دی، احسن اقبال کا دعویٰ

وفاقی وزیر برائے منصوبہ بندی، ڈیویلپمنٹ اینڈ ریفارمز احسن اقبال نے  دعویٰ کیا ہے کہ انہوں نے آکسفورڈ یونیورسٹی میں ایک مباحثے کے دوران پاکستان تحریک انصاف (پی ٹی آئی) کو 145 کے مقابلے میں 184 ووٹوں سے شکست دی ہے۔

یہ بھی پڑھیں:بانی پی ٹی آئی عمران خان سنجیدہ ہیں تو وزیراعظم کو خط لکھیں : احسن اقبال

پیر کو اپنے انتخابی حلقے نارووال میں صحافیوں سے گفتگو کرتے ہوئے وفاقی وزیراحسن اقبال نے کہا کہ انہوں نے چند عرصہ پہلے ہی برطانیہ میں آکسفورڈ یونیورسٹی میں ایک مباحثے کے دوران پاکستان تحریک انصاف کے نمائندے کو شکست سے دوچار کیا، پی ٹی آئی کے نمائندے کو 145 ووٹوں کے مقابلے میں 184 ووٹوں سے شکست دی ہے۔

وفاقی وزیر کا کہنا تھا کہ عمران خان کے نالائق حامیوں نے آکسفورڈ یونیورسٹی لندن میں ہونے والے مباحثے کو سوشل میڈیا پر اچھال کر اپنے ہی لیڈر کو ایکسپوز کر دیا ہے، مجھے وہاں موقع دیا گیا کہ میں بانی پی ٹی آئی کی اصل حقیقت بیان کروں، ایک نوجوان نے بانی پی ٹی آئی کی وکالت کی لیکن ووٹنگ کے دوران اسے بری طرح شکست کا سامنا کرنا پڑا۔

مزید پڑھیں:عوام پروپیگنڈے پر نہیں کارکردگی پر ووٹ دیتے ہیں، احسن اقبال

احسن اقبال کا کہنا تھا کہ یہ سب جانتے ہیں کہ بانی پی ٹی آئی نے ملک میں نفرت کی سیاست کو پروان چڑھایا، انہوں نے نفرت کا ایسا بیج بویا کہ اسی مائنڈ سیٹ سے متاثر ایک نوجوان نے مجھ پر گولی چلائی، جو آج بھی میرے جسم میں ہے، ان لوگوں کو اگر تنقید کرنی ہی ہے تومعیاری تنقید کریں۔

احسن اقبال کا کہنا تھا کہ بانی پی ٹی آئی نے برطانیہ سے ملنے والے 190ملین پاؤنڈ لے کر ایک چور کو دیے، میرا سوال ہے کہ ایسا کرنے کے بعد انہیں کوئی سیاسی قیدی کہے گا یا پھر ایک چور اور مجرم قرار دے گا؟