سوشل میڈیا پر منفی پروپیگنڈا، جے آئی ٹی نے عمر ایوب اور علیمہ خان کو طلب کرلیا

جوائنٹ انوسٹی گیشن ٹیم (جے آئی ٹی) نے سوشل میڈیا پرمنفی پروپیگنڈا کے الزام میں پاکستان تحریک انصاف (پی ٹی آئی ) کے 2 سینیئرترین عہدیداروں کو طلب کر لیا۔

آزاد ڈیجیٹل کو موصول ہونے والے نوٹیفکیشن کے مطابق جوائنٹ انوسٹی گیشن ٹیم نے سوشل میڈیا پر منفی پروپیگنڈے کے الزام میں پاکستان تحریک انصاف کے اپوزیشن لیڈرعمرایوب اور بانی پی ٹی آئی کی بہن علیمہ خان کو طلب کیا ہے۔ جے آئی ٹی نے علیمہ خان کو بدھ 12 مارچ 2025 کو پیش ہونے کی ہدایت کی ہے۔

نوٹیفکیشن کے مطابق عمرایوب کو جے آئی ٹی نے جمعرات 13 مارچ 2025 کو پیش ہونے کا نوٹس جاری کیا ہے، وفاقی حکومت کی قائم کردہ جے آئی ٹی کی سربراہی اسلام آباد پولیس کے آئی جی کر رہے ہیں۔

نوٹیفکیشن کے مطابق جے آئی ٹی الیکٹرانک جرائم کی روک تھام کے ایکٹ 2016 کے سیکشن کے تحت تشکیل دی گئی ہے، جے آئی ٹی کے پاس طلب کیے جانے والے رہنماؤں کے حوالے سے شواہد موجود ہیں۔