سونا مزید مہنگا ، قیمتیں ایک بار پھر تاریخ کی بلند ترین سطح پر

عالمی مارکیٹ میں سونے کی قیمت میں اضافے کا سلسلہ جاری ہے، جس کے سبب پاکستان میں بھی سونے کی قیمت میں بڑا اضافہ ہورہا ہے۔

غیر ملکی میڈیا کے مطابق عالمی مارکیٹ میں 24 قیراط سونا مزید 13 ڈالر فی اونس مہنگا ہوگیا، جس کے بعد عالمی مارکیٹ میں 24 قیراط سونا 3010 ڈالر فی اونس پر پہنچ گیا۔

ذرائع کے مطابق عالمی مارکیٹ میں قیمت میں اضافے کے بعد پاکستان میں بھی فی تولہ سونے کی قیمت میں 1300روپے کا اضافہ ہوگیا ہے۔

پاکستان میں فی تولہ سونا 3 لاکھ 15 ہزار 600 روپے سے زائد پر فروخت ہو رہا ہے۔

اس سے قبل جمعہ کے روز سونے کی فی تولہ قیمت میں کمی واقع ہوئی تھی، سونا فی تولہ 300 روپے کمی سے 3 لاکھ 13 ہزار 700 روپے کا ہوگیا تھا جبکہ 10گرام سونا 257 روپے کمی سے 2 لاکھ 68 ہزار947 روپے کا ہوگیا تھا۔

پاکستان میں گزشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔