شہزادہ محمد بن سلمان اور شہباز شریف کے درمیان اہم ملاقات، معاشی اور اسٹریٹجک تعلقات کو مضبوط بنانے کا عزم

وزیراعظم شہباز شریف نے سعودی ولی عہد اور وزیراعظم محمد بن سلمان سے ریاض میں اہم ملاقات کی ہے، جہاں دونوں رہنماؤں نے تجارت، سرمایہ کاری، توانائی اور سیکیورٹی سمیت اہم شعبوں میں دوطرفہ تعاون کو مضبوط بنانے پر تعمیری تبادلہ خیال کیا ہے۔

یہ بھی پڑھیں:پاکستان سعودی عرب کیساتھ مل کر عالمی معاشی انقلاب لاسکتا ہے، وزیر اعظم

سماجی رابطے کی ویب سائٹ ’ایکس‘ پر اپنے بیان میں وزیراعظم شہباز شریف نے پاکستان کی مسلسل حمایت پر سعودی قیادت کا شکریہ ادا کرتے ہوئے کہا کہ خوشحالی کے مشترکہ وژن کے ذریعے دونوں ممالک کے درمیان دیرینہ دوستی مضبوط ہو رہی ہے۔ انہوں نے کہا کہ مضبوط دوطرفہ تعلقات اب گہری اقتصادی شراکت داری میں تبدیل ہو رہے ہیں۔

اجلاس میں نائب وزیراعظم اسحاق ڈار، چیف آف آرمی اسٹاف جنرل عاصم منیر اور وزیراعلیٰ پنجاب مریم نواز نے بھی شرکت کی اور دونوں فریقین نے تاریخی تعلقات کی اہمیت کو اجاگر کرتے ہوئے انہیں مزید مضبوط بنانے کے عزم کا اعادہ کیا۔ ملاقات میں اقتصادی، تجارتی، سرمایہ کاری اور دفاعی تعاون بڑھانے پر توجہ مرکوز کی گئی۔ وزیراعظم شہباز شریف نے پاکستان میں اہم شعبوں میں سرمایہ کاری بڑھانے کے سعودی عرب کے عزم کو سراہا۔

مزید پڑھیں:ایمرجنگ مارکیٹس کانفرنس میں سعودی عرب اور پاکستان کے درمیان اقتصادی تعلقات میں مزید استحکام

دونوں رہنماؤں نے علاقائی استحکام پر زور دیتے ہوئے دفاعی اور سیکیورٹی تعاون کو مضبوط بنانے کے عزم کا بھی اعادہ کیا۔ میڈیا رپورٹ کے مطابق اجلاس میں مشرق وسطیٰ اور یوکرین میں پیش رفت سمیت اہم جغرافیائی سیاسی امور کا احاطہ بھی کیا گیا۔ وزیر اعظم شہباز شریف نے خطے اور عالمی سطح پر امن کے فروغ میں سعودی عرب کے کردار کو سراہا۔

سعودی ولی عہد کی سعودی عرب میں مقیم پاکستانی کمیونٹی کی ستائش

ولی عہد شہزادہ محمد بن سلمان نے سعودی عرب میں مقیم پاکستانی کمیونٹی کی خدمات کا اعتراف کیا اور دونوں رہنماؤں نے ان کی فلاح و بہبود کے لیے مزید اقدامات اٹھانے پر اتفاق کیا ہے۔ انہوں نے ثقافتی تبادلوں، تعلیمی تعاون اور عوامی سطح پر تعلقات کو مضبوط بنانے پر بھی زوردیا۔

مضبوط شراکت داری کا عزم

وزیراعظم شہباز شریف اور سعودی ولی عہد نے علاقائی استحکام، معاشی ترقی اور باہمی خوشحالی کے لیے مل کر کام کرتے ہوئے اپنی اسٹریٹجک شراکت داری کو نئی بلندیوں تک لے جانے کے عزم کا اعادہ کیا۔ اس سے قبل وزیراعظم محمد شہباز شریف سعودی عرب کے 4 روزہ دورے پر بدھ کو جدہ پہنچے تھے، دورے کا مقصد دوطرفہ تجارت کو مستحکم کرنا اور دونوں ممالک کے درمیان اقتصادی تعاون کو فروغ دینا ہے۔

مکہ مکرمہ پہنچنے پر مکہ مکرمہ کے ڈپٹی گورنر شہزادہ سعود بن مشعل بن عبدالعزیز نے وزیراعظم کا استقبال کیا۔ دورے کے دوران نواز شریف سعودی ولی عہد اور وزیراعظم محمد بن سلمان کے علاوہ دیگر اہم سعودی حکام سے ملاقاتیں کریں گے جس میں تجارت کے فروغ، اہم شعبوں میں شراکت داری اور وسیع تر اقتصادی تعاون پر تبادلہ خیال کیا جائے گا۔

پاکستان اور سعودی عرب بزنس ٹو بزنس (بی ٹو بی) تعاون کو بڑھا رہے ہیں اور دونوں فریقین نے گزشتہ سال اکتوبر میں نواز شریف کے دورہ ریاض کے دوران 34 مفاہمتی یادداشتوں اور 2.8 ارب ڈالر مالیت کے معاہدوں کا اعلان کیا تھا۔ ان معاہدوں میں نجی شعبے کی شراکت داری اور تجارتی منصوبوں کو فروغ دینے پر توجہ مرکوز کی گئی تھی۔

یہ بھی پڑھیں:سعودی عرب کا پاکستان کو مؤخر ادائیگی پر پیٹرولیم مصنوعات کی فراہمی جاری رکھنے کا فیصلہ

سعودی عرب نہ صرف تجارت کے لحاظ سے پاکستان کا ایک اہم معاشی شراکت دار ہے بلکہ اس کی 2.7 ملین پاکستانی تارکین وطن کی وجہ سے بھی پاکستان کے لیے انتہائی اہمیت کا حامل ملک ہے، جو پاکستان کو ترسیلات زر کی ترسیلات زر میں سب سے زیادہ حصہ ڈالتا ہے۔

 گزشتہ ماہ پاکستان کے وزیر تجارت جام کمال خان نے جدہ میں پہلی سولو ’میڈ ان پاکستان‘ نمائش کا افتتاح کیا تھا، جس سے دونوں ممالک کے درمیان مضبوط تجارتی امکانات کو اجاگر کیا گیا تھا۔ گزشتہ 5 سالوں کے دوران 1.7 ملین پاکستانی ورکرز نے سعودی عرب کا رخ کیا ہے جس کی وجہ سے یہ پاکستانی تارکین وطن کے لیے سرفہرست ملک بن گیا ہے۔

وزیراعظم کے ہمراہ اعلیٰ سطح کا وفد

وزیر اعظم شہباز شریف کے ہمراہ نائب وزیراعظم اور وزیر خارجہ سینیٹر اسحاق ڈار، وزیر اعلیٰ پنجاب مریم نواز، اہم وفاقی وزرا اور سینیئر حکام بھی موجود ہیں۔ یہ وفد سعودی ہم منصبوں کے ساتھ سرمایہ کاری کی نئی راہیں تلاش کرنے اور اقتصادی اشتراک کو تلاش کرنے کے لیے سعودی عرب کا دورہ کر رہا ہے۔

مزید پڑھیں:سعودی عرب نے پاکستان سمیت 14 ممالک کے لیے نئی ویزا پالیسی کا اعلان کردیا

وزیراعظم کے دفتر نے اس بات پر زور دیا ہے کہ یہ دورہ پاکستان اور سعودی عرب کے درمیان گہرے تاریخی تعلقات کو مضبوط کرے گا جبکہ دوطرفہ، علاقائی اور عالمی محاذوں پر تجارت، سرمایہ کاری اور سفارتی تعاون کو بڑھانے کی راہ ہموار کرے گا۔