’یوم پاکستان‘ کے موقع پراسلام آباد میں گاڑیوں کے داخلے کے لیے اوقات کار اور روٹ پلان جاری

اسلام آباد ٹریفک پولیس نے 23 مارچ کو ’یوم پاکستان‘ کے موقع پر ہیوی ٹریفک کے لیے اوقات کار اور روٹ پلان تشکیل دے دیا ہے۔

اسلام آٰباد ٹریفک پولیس کی جانب سے جاری نوٹیفکیشن میں کہا گیا ہے کہ ’عوام الناس کو مطلع کیا جاتا ہے کہ مورخہ 23 مارچ یوم پاکستان کو مختلف اوقات میں ٹریفک ڈائیورشن پلان ترتیب دے دیا گیا ہے۔  مورخہ 22 مارچ 2025 دوپہر 12 بجے سے 23 مارچ 2025 سہ پہر3 بجے تک ہر قسم کی ہیوی ٹریفک کے لیے اسلام آباد میں داخلہ ممنوع ہو گا۔

پلان کے مطابق 23 مارچ 6 بجے صبح سے 01 بجے دن تک سری نگر ہائی سیونتھ ایونیو سے کوڑیانوالہ چوک تک سڑک آنے جانے والی ٹریفک کے لیے بند رہے گی۔

سی ٹی او کیپٹن ذیشان کے مطابق بہارہ کہو جانے والی ٹریفک سیونتھ ایونیو سے پاک چائینہ روڈ، راول ڈیم چوک، کشمیر چوک، کلب روڈ کا استعمال کرے گی، روٹ کے باعث سری نگر ہائی وے اور ایکسپریس وے پر ٹریفک تعطل کا شکار رہے گی، پشاور سے لاہور جانیوالی ہیوی ٹریفک براستہ ٹیکسلا موٹروے اور ترنول پھاٹک سے فتح جنگ موٹر وے استعمال کرے گی۔

ٹریفک پلان کے مطابق لاہور جی ٹی روڈ سے اسلام آباد اور راولپنڈی جانے والی ہیوی ٹریفک چک بیلی روڈ سے چکری موٹروے استعمال کر سکتی ہے، جبکہ  جی ٹی روڈ پشاور سے روات جانے والے شہری ٹیکسلا موٹروے، چکری، چک بیلی روڈ، روات والا روٹ استعمال کر سکیں گے۔

نوٹیفکیشن کے مطابق لاہور جی ٹی روڈ سے پشاور جانے والے شہری روات، چک بیلی روڈ چکری، ٹیکسلا موٹروے والا راستہ استعمال کر سکتے ہیں۔ اسی طرح شہریوں کی رہنمائی کے لیے اسلام آباد ٹریفک پولیس مختلف مقامات پر موجود رہے گی۔

ٹریفک پلان کے مطابق سی ٹی او سفر کے دوران کسی بھی پریشانی اور رہنمائی کے لیے ٹریفک ہیلپ لائن 1915 پر رابطہ کریں اور مزید معلومات کے لیےFM 92.4  ٹیون کریں۔ ٹریفک پولیس کا سوشل میڈیا پلیٹ فارم شہریوں کو بروقت ٹریفک روٹس سے متعلق آگاہی کے لیے موجود رہے گا۔