پراپرٹی خریداروں کے لیے بڑی خوشخبری، آئی ایم ایف ود ہولڈنگ ٹیکس کم کرنے پر متفق

بین الاقوامی مالیاتی فنڈ (آئی ایم ایف) نے اپریل 2025 سے پراپرٹی کی خریداری پر ود ہولڈنگ ٹیکس (ڈبلیو ایچ ٹی) میں 2 فیصد کمی کرنے پر اصولی طور پر اتفاق کیا ہے جبکہ پراپرٹی فروخت کنندگان پر ٹیکس کی شرح میں کوئی تبدیلی نہیں کی گئی ہے۔

ہفتہ کے روز میڈیا رپورٹس کے مطابق یہ فیصلہ فیڈرل بورڈ آف ریونیو (ایف بی آر) کی جانب سے رئیل اسٹیٹ سیکٹر میں ٹرانزیکشن کی لاگت کم کرنے کے لیے ریلیف کی درخواست کے بعد کیا گیا ہے۔

عالمی مالیاتی فنڈ نے خریداروں پر فیڈرل ایکسائز ڈیوٹی (ایف ای ڈی) میں کمی پر بھی رضامندی ظاہر کی ہے ، جس سے اعلیٰ ٹیکس سلیب 10 فیصد سے کم کرکے 9 فیصد کر دی گئی ہے۔ تاہم  فروخت کنندگان پر ایف ای ڈی موجودہ سطح پر برقرار رہے گا۔ یہ رعایتیں پاکستانی حکام اور آئی ایم ایف کے درمیان جمعہ کی شب ہونے والے ورچوئل اجلاس میں دی گئیں تھیں، اس دوران اقتصادی اور مالیاتی پالیسیوں کی یادداشت (ایم ای ایف پی) کو حتمی شکل دینے کی جانب پیش رفت بھی کی گئی تھی۔ عملے کی سطح پر معاہدہ اگلے ہفتے متوقع ہے۔

ایف بی آر نے ابتدائی طور پر انکم ٹیکس آرڈیننس کی دفعہ 236 سی اور 236 کے کے تحت فروخت کنندگان اور خریداروں دونوں کے لیے کٹوتی کی تجویز پیش کی تھی لیکن آئی ایم ایف نے صرف خریداروں کے لیے اس کٹوتی کی منظوری دی ہے۔ خریداروں کے لیے موجودہ ڈبلیو ایچ ٹی کی شرح پراپرٹی کی قیمت پر منحصر 3 سے  4 فیصد کے درمیان ہے۔

ایف بی آر نے اپنے اس استدلال کی تائید میں اعداد و شمار پیش کیے کہ ٹرانزیکشن کے زیادہ اخراجات سرمایہ کاری اور رئیل اسٹیٹ کی محدود سرگرمیوں کو روکتے ہیں۔ آئی ایم ایف کو بتایا گیا کہ خریداروں پر ٹیکس کے بوجھ کو کم کرنے سے اس شعبے کی حوصلہ افزائی میں مدد مل سکتی ہے۔

دوسری جانب آئی ایم ایف نے ایف بی آر کے مارچ 2025 کے ٹیکس وصولی کے ہدف میں 60 ارب روپے کی کمی کی منظوری دے دی ہے جس کے بعد یہ ہدف 1220 ارب روپے سے کم ہو کر 1160 ارب روپے رہ گیا ہے۔ عید الفطر کی تعطیلات کی وجہ سے ایڈجسٹمنٹ میں کام کے دن کم ہوتے ہیں۔ پورے سال کے ہدف کو بھی 12 ہزار 970 ارب روپے سے بڑھا کر 12 ہزار 332 سے 12 ہزار 334 ارب روپے کر دیا گیا ہے۔

مارچ کے شارٹ فال کو پورا کرنے کے لیے آئی ایم ایف نے ایف بی آر سے اپریل اور مئی میں وصولیوں میں اضافہ کرنے کو کہا ہے تاکہ نئے سالانہ ہدف کو برقرار رکھا جا سکے۔ دریں اثنا آئی ایم ایف نے بجلی کے شعبے میں بڑھتے ہوئے گردشی قرضوں سے نمٹنے میں مدد کے لیے بینکوں کے ذریعے 1257 ارب روپے جمع کرنے کے حکومت کے منصوبے کی بھی منظوری دے دی ہے۔ پراپرٹی بیچنے والوں پر ٹیکس کی شرح برقرار ہے۔