یکم اپریل سے ٹول ٹیکس میں مزید اضافہ

ملک بھر میں قومی شاہراہوں اور موٹرویز پر ٹول ٹیکس میں ایک بار پھر اضافہ کر دیا گیا ۔

نیشنل ہائی وے اتھارٹی (این ایچ اے) کے مطابق یکم اپریل سے ٹول چارجز میں رواں مالی سال کے دوران چوتھا اضافہ کیا جائے گا۔ اس سے قبل گزشتہ مرتبہ یکم جنوری کو ٹول ٹیکس میں اضافہ کیا گیا تھا۔

این ایچ اے کی ویب سائٹ پر جاری نوٹیفکیشن کے مطابق مختلف گاڑیوں کے لیے ٹول چارجز میں اضافہ کیا گیا ہے۔ گاڑیوں کے لیے ٹول 70 روپے، وینز کے لیے 150 روپے، اور بسوں کے لیے 250 روپے مقرر کیا گیا ہے۔ دو اور تین ایکسل والے ٹرکوں کے لیے ٹول 300 روپے جبکہ بڑے ٹرکوں کے لیے 550 روپے وصول کیے جائیں گے۔

مزید پڑھیں: کاروں کی قیمتوں میں کمی کا امکان

کئی اہم موٹرویز پر ٹول چارجز میں نمایاں اضافہ کیا گیا ہے۔ ایم ون (اسلام آباد-پشاور موٹروے) پر گاڑیوں کا ٹول 500 روپے سے بڑھا کر 550 روپے کر دیا گیا ہے۔ اسی طرح ایم تھری (لاہور-عبدالحکیم موٹروے) پر ٹول 700 روپے سے بڑھ کر 800 روپے ہو گیا ہے۔ ایم فور (پنڈی بھٹیاں-فیصل آباد-ملتان روٹ) پر گاڑیوں کے لیے ٹول 950 روپے سے بڑھا کر 1,050 روپے کر دیا گیا ہے۔

اسی طرح ایم فائیو (ملتان-سکھر موٹروے) پر گاڑیوں کا ٹول 1,100 روپے سے بڑھ کر 1,200 روپے، ایم 14 (ڈیرہ اسماعیل خان-ہکلہ موٹروے) پر ٹول 600 روپے سے بڑھ کر 650 روپے، اور ای 35 (حسن ابدال-حویلیاں-مانسہرہ) پر گاڑیوں کے لیے ٹول 250 روپے سے بڑھ کر 300 روپے کر دیا گیا ہے۔ بڑی گاڑیوں کے لیے ان موٹرویز پر ٹول ریٹ 850 روپے سے لے کر 5,750 روپے تک مقرر کیا گیا ہے۔