آزاد کشمیر سمیت ملک بھر میں عیدالفطر پر ٹرانسپورٹ کرایوں میں خصوصی کمی کا اعلان

صوبہ پنجاب میں ریجنل ٹرانسپورٹ اتھارٹی (آر ٹی اے) اور ضلعی انتظامیہ نے عید سے قبل راولپنڈی سے آزاد کشمیر، خیبر پختونخوا، بلوچستان، سندھ اور جنوبی پنجاب سمیت مختلف مقامات کے لیے ٹرانسپورٹ کے کرایوں میں 30 سے 100 روپے تک کمی کا اعلان کیا ہے، جبکہ مسافر پبلک ٹرانسپورٹ پر من مانے کرایے وصول کرنے کی شکایات کر رہے ہیں۔

عیدالفطر کے قریب آتے ہی لوگ اپنے اہل خانہ کے ساتھ عید منانے کے لیے سفر کرنا شروع کر رہے ہیں، ضلع راولپنڈی کے تمام ٹرانسپورٹ مراکز بشمول پیرودھائی جنرل بس اسٹینڈ اور ریلوے اسٹیشن پر ’رش‘ بڑھ گیا ہے۔ تاہم اوور لوڈنگ اور پبلک ٹرانسپورٹ کے کرایوں میں من مانے اضافے کی شکایات آ رہی ہیں، بہت سے مسافروں نے دعویٰ کیا ہے کہ کرایوں میں کمی کے اعلان پر عمل درآمد نہیں کیا جا رہا ہے۔

میڈیا رپورٹ کے مطابق چھوٹے بچوں کے لیے پورا کرایہ لیا جا رہا ہے اور مسافروں کو سامان کے لیے بھی اضافی ٹکٹ لینے پر مجبور کیا جا رہا ہے۔ جمعہ سے رش میں شدت آنے کی توقع کے پیش نظر حفاظتی اقدامات بھی سخت کر دیے گئے ہیں۔ بعض مقامات پر مسافروں کو بورڈنگ سے پہلے سیکیورٹی چیکنگ سے گزرنا پڑ رہا ہے اور تمام بڑے ٹرانسپورٹ مراکز میں سی سی ٹی وی کیمرے نصب کیے گئے ہیں۔

میڈیا رپورٹ کے مطابق صورتحال پر نظر رکھنے کے لیے آر ٹی اے کے فیلڈ اسٹاف کو بھی تعینات کیا گیا ہے۔ دریں اثنا شہر کے اندر پبلک ٹرانسپورٹ کی کمی کی وجہ سے مقامی راستوں پر کرایوں میں اضافہ ہوا ہے ، جس سے مسافروں کی پریشانیوں میں اضافہ ہوا ہے۔

آر ٹی اے کے مطابق نظر ثانی شدہ کرایوں میں راولپنڈی لاہور موٹروے کا کرایہ 1700 روپے سے کم کرکے 1600 روپے جبکہ لاہور جی ٹی روڈ کا کرایہ 1300 روپے سے کم کرکے 1200 روپے کردیا گیا ہے۔

فیصل آباد کا کرایہ 1350 روپے سے کم ہو کر 1280 روپے، سرگودھا کا کرایہ 1600 روپے سے کم ہو کر 1500 روپے اور بھکر کا کرایہ 1900 روپے سے کم ہو کر 1800 روپے ہو گیا ہے۔ اسی طرح راولپنڈی سے گجرانوالہ کا کرایہ اب 770 روپے کے بجائے 675 روپے جبکہ مظفر آباد، آزاد کشمیر کا کرایہ 1200 روپے سے کم کرکے 1100 روپے کردیا گیا ہے۔

رپورٹ کے مطابق ضلع باغ آزاد کشمیر کا کرایہ 800 روپے سے کم ہو کر 780 روپے جبکہ کوٹلی کا کرایہ 950 روپے سے کم کر کے 900 روپے کر دیا گیا ہے۔ کراچی جانے والے مسافروں کو 6 ہزار کے بجائے 5 ہزار 500 روپے جبکہ چترال جانے والے مسافروں کو 2600 روپے کے بجائے 2500 روپے ادا کرنے ہوں گے۔

کوئٹہ کا کرایہ 3500 روپے سے کم کر کے 3400 روپے کر دیا گیا ہے جبکہ سلیپر سروس کا کرایہ 5100 روپے سے کم کر کے 5000 روپے کر دیا گیا ہے۔ پشاور کے لیے کرایہ 650 روپے کے بجائے 600 روپے جبکہ مردان کے لیے کرایہ 425 روپے سے کم کر کے 405 روپے کر دیا گیا ہے۔ مانسہرہ کا سفر 570 روپے کے بجائے 540 روپے، بنوں کا کرایہ 1050 روپے کے بجائے 1000 روپے، کوہاٹ کا کرایہ 285 روپے کے بجائے 270 روپے اور چارسدہ کا کرایہ 475 روپے کے بجائے 450 روپے کر دیا گیا ہے۔

ان کٹوتیوں کے باوجود مسافر غیر مطمئن ہیں، پیرودھائی موڑ ٹرانسپورٹ اسٹینڈ پر مسافروں کا دعویٰ ہے کہ کرایوں میں کٹوتی صرف کاغذوں پر کی جا رہی ہے اور حقیقت میں کرایوں میں اضافہ کیا جا رہا ہے اور بسیں اور گاڑیاں گنجائش سے زیادہ بھری جا رہی ہیں۔

میڈیا رپورٹ کے مطابق سیکرٹری آر ٹی اے ارشد علی نے یقین دلایا کہ جمعرات 27 مارچ سے تمام ٹرانسپورٹ ٹرمینلز پر فیلڈ اسٹاف تعینات کیا جائے گا تاکہ کرایوں میں کمی پر عمل درآمد کرایا جاسکے۔ انہوں نے متنبہ کیا کہ خلاف ورزی کے نتیجے میں جرمانے اور گاڑیاں ضبط کی جائیں گی۔ اسسٹنٹ کمشنرز صورتحال پر نظر رکھیں گے، ٹکٹوں کی قیمتوں کی تصدیق اور اوور چارجنگ اور اوور لوڈنگ کی روک تھام کے لیے سرپرائز چیکنگ کریں گے۔