وزیر خزانہ محمد اورنگزیب نے کہا ہے کہ حکومت ملکی برآمدات کو بڑھانے کی حکمت عملی پر عمل پیرا ہے، حکومت کی توجہ معیشت کو بہتر بنانے پر مرکوز ہے ۔
تفصیلات کے مطابق وزیر خزانہ سینیٹر محمد اورنگزیب نے چین کے باؤ فورم کے دوران عالمی جریدے بلوم برگ کو انٹرویو دیتے ہوئے کہا کہ وزیر اعظم شہباز شریف کی قیادت میں بجلی کے نرخوں میں کمی لانے کے اقدامات کیے جا رہے ہیں اس حوالے سے جلد ہی وزیر اعظم کی طرف سے اعلان متوقع ہے اس اقدام سے مینوفیکچرنگ سیکٹر کو فروغ ملے گا اور برآمدات میں اضافہ ہو گا۔
آنے والے وفاقی بجٹ میں ٹیکس کا دائرہ وسیع کرنے پر توجہ دی جائے گی، انہوں نے کہا کہ رئیل اسٹیٹ، ریٹیل اور زراعت جیسے شعبوں کو ٹیکس نظام میں شامل کیا جائے گا ٹیکس بنیادوں کو وسعت دے کر مینوفیکچرنگ سیکٹر پر غیر ضروری ٹیکسوں کا بوجھ کم کرنا ہےمینوفیکچرنگ سیکٹر اب تک ٹیکس کا بڑا حصہ ادا کر رہا ہے وزیر خزانہ نے مہنگائی کے رجحانات پر اطمینان کا اظہار کیا۔
مجموعی اور بنیادی مہنگائی کی سطح پر گہری نظر رکھی جا رہی ہے، اس سال کے دوران شرح سود میں مزید کمی متوقع ہے، شرح سود میں کمی سے اقتصادی ترقی کے لیے حالات مزید بہتر ہوں گے۔پاکستان اس کیلنڈر سال میں پہلا چینی یوان بانڈ جاری کرنے کا ارادہ رکھتا ہےیوان بانڈ کی مالیت 200 سے 250 ملین ڈالر کے درمیان ہوگی ۔
ان کا کہنا تھا کہ بانڈ کا حجم اہم نہیں بلکہ فنڈنگ ذرائع میں تنوع مقصود ہے، اس فنڈ کا استعمال موسمیاتی تبدیلی سے متعلق منصوبوں کے لیے کیا جائے گا، محمد اورنگزیب نے مزید کہا کہ اقدام کا مقصد امریکہ، یورپ اور اسلامی سکوک کی روایتی منڈیوں سے ہٹ کر مالیاتی ذرائع کو متنوع بنانا ہےیہ ایک موزوں وقت ہے کہ پاکستان دنیا کی دوسری سب سے بڑی اور گہری کیپٹل مارکیٹ سے فائدہ اٹھائے ۔
By 
