پی ٹی آئی کو بیرونی نہیں اندرونی سازشوں سے خطرہ ہے: اسلم غوری

جمعیت علمائے اسلام کے مرکزی ترجمان اسلم غوری نے تحریک انصاف کیساتھ فاصلوں میں وزیر اعلیٰ خیبر پختونخوا علی امین گنڈا پور کو ذمہ دار قرار دیتے ہوئے کہا ہے کہ علی امین گنڈا پور تحریک انصاف کے گوربا چوف ہیں ۔

علی امین گنڈا پور نے علماءکی تضحیک کرکے اپنی گھٹیا ذہنیت کا اظہار کیا ہے علماء کرام انبیاء کے وارث ہیں ان کی توہین برداشت نہیں کی جائے گی ۔ پی ٹی آئی وضاحت کرے کیا علی امین کا علماء کے بارے میں بیان ان کی پارٹی پالیسی ہے ؟۔

یہ بھی پڑھیں:پارٹی میں کسی سطح پر فارورڈ بلاک نہیں بن رہا: چیئرمین پی ٹی آئی

عمران خان کی واضح ہدایات کے باوجود علی امین مولانا فضل الرحمان کے خلاف ہرزہ سرائی کر رہا ہے اور تحریک انصاف اور جےیوآئی کے درمیان فاصلوں کو بڑھانے کی سازش کر رہاہے۔گرینڈ اپوزیشن میں رکاوٹ سے حکومت اور غیر جمہوری قوتوں کو فائدہ ہو گا۔

پی ٹی آئی کو بیرونی نہیں اندرونی سازشوں سے خطرہ ہے ،جب اپوزیشن اتحاد بننے کے قریب ہوتا ہے سازشی عناصر اپنا کام شروع کر دیتے ہیں۔ علی امین گنڈا پور اپنی حکومت کو دوام دینے کیلئے اپوزیشن اتحاد سے خوفزدہ ہے ۔

یہ بھی پڑھیں:ڈکیتی کے دوران خاتون کے ساتھ زیادتی کرنے والا ملزم گرفتار

انہوں نے کہا کہ پی ٹی آئی قیادت پارٹی کے اندر سازشیوں پر نظر رکھے، اپوزیشن گرینڈ الائنس کو ہماری کمزوری نہ سمجھا جائے۔