ڈونلڈ ٹرمپ تیسری بار بھی صدر بننے کے خواہشمند ، آئین میں ترمیم کا عندیہ

امریکی صدر ڈونلڈ ٹرمپ نے تیسری بار صدر بننے کی خواہش کا اظہار کردیا ہے، حالانکہ امریکی آئین کی 22ویں ترمیم کے تحت انہیں ایسا کرنے کی اجازت نہیں ہے۔

امریکی میڈیا  کو دیے گئے خصوصی انٹرویو میں ٹرمپ نے کہا کہ اس کے لیے ”طریقے موجود ہیں“ اور یہ واضح کیا کہ وہ ”مذاق نہیں کر رہے، اس کے لیے  انہوں نے ایک آئینی راستے کا بھی حوالہ دیا۔

ڈونلڈ ٹرمپ کا کہنا تھا کہ کچھ راستے موجود ہیں جن کے ذریعے امریکی آئین کی اس حد سے تجاوز کیا جا سکتا ہے جو صدور کو تیسری مدت کے لیے عہدہ رکھنے سے روکتا ہے۔

ایک سوال کے جواب میں ان کا کہنا تھا کہ بہت سے لوگ چاہتے ہیں کہ میں ایسا کروں لیکن میں ان سے کہتا ہوں کہ ابھی بہت وقت باقی ہے، تاہم یہ ابتدائی مرحلہ ہے۔

انٹرویو میں ٹرمپ سے پوچھا گیا کہ آیا وہ اپنی دوسری مدت مکمل ہونے کے بعد بھی اقتدار میں رہنے کی کوشش کریں گے؟ جس کے جواب میں ٹرمپ نے میزبان کو بتایا کہ ایسے طریقے موجود ہیں جن کے ذریعے آپ ایسا کر سکتے ہیں۔

یہ بھی پڑھیں: چیئرمین جوائنٹ چیفس آف سٹاف کمیٹی اور سروسز چیفس کی جانب سے تمام اہلِ وطن کو عیدالفطر کی دلی مبارکباد

ٹرمپ نے کہا کہ ٹھیک ہے، کچھ منصوبے ہیں لیکن پھر فوراً ہی اپنی بات کی تصحیح کرتے ہوئے کہا کہ منصوبے نہیں بلکہ طریقے ہیں،ایسے طریقے جن کے ذریعے آپ ایسا کرسکتے ہیں۔

دوسری جانب ڈونلڈ ٹرمپ کے اتحادی اسٹیو بینن نے  ایک انٹرویو میں کہا کہ انہیں یقین ہے کہ ٹرمپ 2028 میں دوبارہ انتخاب لڑیں گے اور جیتیں گے، موجودہ امریکی صدر کے تیسری مدت حاصل کرنے کے لیے ”کئی متبادل طریقے“ موجود ہو سکتے ہیں۔

واضح رہے کہ ری پبلکنز نے صدر ڈونلڈ ٹرمپ کی تیسری مدت کے لیے آئینی ترمیم کے لیے کوششیں شروع کردی ہیں، امریکی ایوان میں صدر کو تیسری بار منتخب کرنے کی قرارداد پیش کردی گئی ہے۔