پی ٹی آئی کی عمران سے ملاقات کے لیے کمیٹی تشکیل، اجازت نہ ملنے پر توہین عدالت کی پٹیشن دائر کرنے کا فیصلہ

پاکستان تحریک انصاف (پی ٹی آئی ) نے بانی چیئرمین عمران خان سے اڈیالہ جیل میں ملاقات کے لیے 5 رکنی کمیٹی تشکیل دینے اور انتظامیہ کی جانب سے ملاقات کی اجازت نہ دینے پر توہین عدالت کی پٹیشن دائر کرنے کا فیصلہ کیا ہے۔

اتوار کو پاکستان تحریک انصاف کے مرکزی سیکریٹری اطلاعات شیخ وقاص اکرم کی جانب سے جاری اعلامیے میں کہا گیا ہے کہ پاکستان تحریک انصاف کی سیاسی کمیٹی کا اجلاس منعقد ہوا، جس میں ملک کی موجودہ مجموعی صورتحال سمیت اہم امور پر تفصیل سے گفتگو کی گئی ہے۔

اعلامیے کے مطابق اجلاس میں متفقہ طور پر فیصلہ کیا گیا کہ بانی چیئرمین سے ملاقات کے لیے 5 رکنی کمیٹی تشکیل دی جائے گی، یہ کمیٹی ہر منگل اور جمعرات کو بانی چیئرمین سے ملاقات کرنے والوں کے ناموں کی فہرست مرتب کرے گی، جہاں تک ممکن ہوا، ایک میٹنگ میں اگلی میٹنگ کی فہرست کی منظوری بانی چیئرمین سے لی جائے گی۔

اعلامیے کے مطابق فہرست بانی پی ٹی آئی کے نامزد 3 فوکل پرسنز (گوہر علی خان، سلمان اکرم راجہ اور انتظار پنجھوتہ) میں سے کسی ایک کے ذریعے جیل حکام کو ارسال کی جائے گی، یہ طریقہ بانی چیئرمین کی ہدایت اور اسلام آباد ہائیکورٹ کے حکم کے مطابق ہے۔

اجلاس میں  واضح کیا گیا کہ فہرست کے علاوہ کوئی بھی فرد بانی چیئرمین سے ملاقات نہیں کرے گا۔ ایسا کرنے والا پارٹی ڈسپلن اور مقرر کردہ قاعدے سے منحرف تصور ہو گا،  فہرست میں دیے گئے افراد میں سے کسی فرد کو انتظامیہ کی جانب سے روکے جانے کی صورت میں باقی افراد بانی چئیرمین سے زیر احتجاج ملاقات کر سکتے ہیں۔ ایسی صورت میں جیل حکام کے خلاف فوری طور پر توہین عدالت کی پیٹیشن دائر کی جائے گی۔

اعلامیے میں بتایا گیا ہے کہ خیبر پختونخوا کے حکومتی عہدیداروں کو اس حوالے سے استثنیٰ حاصل ہوگا، وہ کسی بھی دن اور کسی بھی وقت بانی چیئرمین سے ملاقات کے لیے آزاد ہوں گے،  اس کے لیے 5 رکنی کمیٹی کی فہرست کی پابندی لازم نہیں ہوگی۔