خیبر پختونخوا مائنز اینڈ منرلز بل کی حتمی منظوری عمران خان سے مشاورت کے بغیر نہیں دی جائے گی، پی ٹی آئی کا نوٹیفکیشن جاری

خیبر پختونخوا مائنز اینڈ منرلز بل 2025 اور صوبے بھر میں اس سے پیدا ہونے والے وسیع تر مفاد، تشویش اور آرا  کے پیش نظر پاکستان تحریک انصاف (پی ٹی آئی ) خیبر پختونخوا نے قانون سازی کا جامع جائزہ لینے کے لیے 3 رکنی کمیٹی تشکیل دے دی ہے۔

منگل کو پاکستان تحریک انصاف کی جانب سے جاری نوٹیفکیشن کے مطابق 3 رکنی کمیٹی میں ممبر صوبائی اسمبلی علی اصغر خان، جنرل سیکرٹری، پی ٹی آئی خیبر پختونخوا ، رکن قومی اسمبلی ڈاکٹر امجد علی خان، رکن قومی اسمبلی ارباب شیر علی خان شامل ہیں۔

نوٹیفکیشن کے مطابق کمیٹی کو بل کا تفصیلی جائزہ لینے، اہم خلا یا ابہام کی نشاندہی کرنے اور شفافیت کو مضبوط بنانے، صوبائی خودمختاری کے تحفظ، کمیونٹی کے حقوق کو برقرار رکھنے اور اس بات کو یقینی بنانے کے لیے سفارشات تیار کرنے کی ذمہ داری سونپی گئی ہے کہ قانون وسیع تر عوامی مفاد میں ہے۔ کمیٹی اپنے کام سے آگاہ کرنے کے لیے متعلقہ اسٹیک ہولڈرز بشمول قانونی ماہرین، کمیونٹی رہنماؤں اور دیگر ماہرین کے ساتھ رابطہ کر سکتی ہے۔

نوٹیفکیشن کے مطابق ابتدائی جائزے اور ظاہر کردہ خدشات کے بعد، یہ واضح ہے کہ مزید وضاحت اور ممکنہ ترامیم ضروری ہیں۔ کمیٹی جس نے پہلے ہی غور و خوض شروع کر دیا ہے، بہت جلد اپنے نتائج اور تجاویز خیبر پختونخوا حکومت اور پارٹی کی مرکزی قیادت کو پیش کرے گی۔

نوٹیفکیشن میں بتایا گیا ہے کہ پاکستان تحریک انصاف خیبر پختونخوا نے سختی سے سفارش کی ہے کہ بل کی حتمی منظوری چاہے وہ جزوی ہو یا مکمل، پہلے ان نتائج اور سفارشات کی روشنی میں بل کا جائزہ لیے بغیر اور پھر سیاسی کمیٹی کے فیصلے کے مطابق چیئرمین عمران خان سے مشاورت کے بغیر نہیں دی جائے گی۔ ان کی ہدایت اور فیصلہ جیسا کہ سب متفق ہیں، اس بات کا تعین کرنے کے لیے اہم ہے کہ آیا اس ایکٹ کو صوبائی اسمبلی میں کیسے لایا جائے۔