پاکستان معاشی بحالی اور تبدیلی کے اہم موڑ پر پہنچ چکا ہے، وزیر خزانہ محمد اورنگزیب

وفاقی وزیر خزانہ و محصولات سینیٹر محمد اورنگزیب نے کہا ہے کہ پاکستان معاشی بحالی اور تبدیلی کے اہم موڑ پر پہنچ چکا ہے۔

ہارورڈ یونیورسٹی میں پاکستان کی جامع ترقی اور گورننس سے متعلق پاکستان کانفرنس 2025سے خطاب کرتے ہوئےوفاقی وزیر خزانہ نے کہا کہ موجودہ حکومت کو جی ڈی پی سے لے کر ذخائر میں کمی تک اہم چیلنجز کا سامنا کرنے والی معیشت وراثت میں ملنے کے بعد ہم نے بنیادی اصولوں کو مستحکم کیا ہے، عوام کا اعتماد بحال ہوا ہے اور ملک ترقی کی راہ پر گامزن ہو گیا ہے۔

یہ بھی پڑھیں:وزیراعظم جلد مزید ریلیف پیکجز کا اعلان کریں گے، وزیر خزانہ محمد اورنگزیب

اپنے خطاب میں وزیر خزانہ محمد اورنگزیب نے اہم کامیابیوں پر حوالہ دیا اور بتایا کہ ملک میں افراط زر میں تاریخی کمی 0.7 فیصد تک پہنچ گئی ہے، جو 60 سال میں کم ترین سطح ہے۔ زرمبادلہ کے ذخائر میں دوگنا اضافہ ہوا، کرنسی کی قدر میں3 فیصد اضافہ ہوا جبکہ مارچ 2025 میں کرنٹ اکاؤنٹ سرپلس ایک ارب ڈالر سے تجاوز کر گیا۔

وزیر خزانہ نے بتایا کہ پاکستان میں براہ راست غیر ملکی سرمایہ کاری (ایف ڈی آئی) میں 44 فیصد اضافہ، آئی ٹی برآمدات میں 24 فیصد اضافہ اور ترسیلات زر میں ریکارڈ اضافہ دیکھا گیا۔ 24 سال میں پہلی بار پاکستان نے مالی سرپلس حاصل کیا ہے، جو 2 دہائیوں میں سب سے زیادہ پرائمری مالی سرپلس ہے۔ انہوں نے بتایا کہ عالمی کریڈٹ ریٹنگ ایجنسی فچ نے مستحکم نقطہ نظر کے ساتھ پاکستان کی خودمختار کریڈٹ ریٹنگ کو بی تک بڑھا دیا ہے۔

محمد اورنگزیب نے اس بات پر زور دیتے ہوئے کہ ’استحکام اختتام نہیں بلکہ اختتام کا ذریعہ ہے‘ وزیر خزانہ نے حکومت کی حکمت عملی کا خاکہ پیش کیا جس میں مالی نظم و ضبط کو برقرار رکھنا، افراط زر پر قابو پانا اور توانائی، ٹیکسیشن، گورننس اور سرکاری ملکیت کے اداروں کے انتظام میں گہری ساختی اصلاحات شامل ہیں۔

انہوں نے پاکستان کے معدنی وسائل سے مالا مال ہونے، آئی ٹی سیکٹر میں توسیع، گرین انرجی اقدامات اور ملک کی نوجوان آبادی کو ترقی کے بڑے مواقع قرار دیا ۔ انہوں نے زور دے کر کہا کہ اعلیٰ، جامع ترقی کو برقرار رکھنے کے لیے انسانی ترقی کو مضبوط بنانا اہم ہے۔

قرضوں کے انتظام کے بارے میں وزیر خزانہ نے کہا کہ پاکستان نے کامیابی کے ساتھ اپنے سرکاری قرضوں اور جی ڈی پی کے تناسب کو 75 فیصد سے کم کرکے 67.2 فیصد کر دیا ہے اور دانشمندانہ مالی انتظام، بہتر گھریلو فنانسنگ اور ٹیکس اصلاحات کے ذریعے درمیانی مدت میں اسے 60 فیصد سے نیچے لانے کا منصوبہ بنایا گیا ہے۔

یہ بھی پڑھیں:حکومت اشیائے ضروریہ کی قیمتوں پر کڑی نظر رکھے ہوئے ہے: وفاقی وزیر خزانہ محمد اورنگزیب

سرکاری اخراجات کے باوجود خسارے میں چلنے والے سرکاری اداروں کی نجکاری سے توقع ہے کہ شفافیت، مسابقتی عمل اور سرمایہ کاروں کے اعتماد پر توجہ مرکوز کرنے کی کوششوں کے ساتھ سالانہ جی ڈی پی کا 2 فیصد تک بچایا جائے گا۔

پاکستان کے مالیاتی شعبے پر تبادلہ خیال کرتے ہوئے وزیر خزانہ نے ڈیجیٹل بینکاری، کیپٹل مارکیٹس اور گرین فنانس کو وسعت دے کر ایک گہرا اور زیادہ لچکدار نظام تشکیل دینے کے منصوبوں کا ذکر کیا۔

آب و ہوا کی تبدیلی کے اثرات پر روشنی ڈالتے ہوئے وفاقی وزیر نے انفراسٹرکچر اور زراعت میں لچک کو ضم کرنے کے پاکستان کے عزم کا اعادہ کیا۔ انہوں نے آئی ایم ایف اور کنٹری پارٹنرشپ پروگرام (سی پی ایف) کی جانب سے آب و ہوا میں لچک پیدا کرنے کے لیے اینکر کے طور پر منظور کردہ لچک دار اور پائیداری کی سہولت (آر ایس ایف) کا حوالہ دیا۔

انہوں نے کہا کہ پاکستان کا مستقبل جرات مندانہ اور ضروری فیصلوں سے تشکیل دیا جائے گا۔ اپنے عوام میں سرمایہ کاری کرکے، اپنی معیشت کو جدید بنانے اور اصلاحات کے لیے پرعزم رہنے سے پاکستان مضبوط، سرسبز اور زیادہ مسابقتی بن کر ابھرے گا۔

مزید پڑھیں:وزیراعظم شہباز شریف جلد بجلی کے نرخوں میں کمی کا اعلان کریں گے : وزیر خزانہ محمد اورنگزیب

بعد ازاں وفاقی وزیر نے شرکاء سے بات چیت کی اور پاکستان کی معیشت کے مستقبل کے روڈ میپ کے حوالے سے ان کے سوالات کے جوابات دیے۔  واضح رہے کہ ہاورڈ یونیورسٹی میں پاکستان کانفرنس ایک سالانہ فلیگ شپ ایونٹ ہے جس میں پالیسی سازوں، ماہرین تعلیم، کاروباری رہنماؤں اور طلبا کو پاکستان کی معاشی، سیاسی اور سماجی سمت پر تبادلہ خیال کرنے کے لیے اکٹھا کیا جاتا ہے۔

ہارورڈ یونیورسٹی کے تحقیقی مراکز کے تعاون سے منعقد ہونے والی یہ کانفرنس امریکا میں پاکستان کے بارے میں طلبا کی قیادت میں ہونے والی سب سے بڑی کانفرنس ہے۔ یہ کانفرنس مشترکہ حل کو آگے بڑھانے، عالمی مصروفیت کو فروغ دینے اور پاکستانی عوام کی تخلیقی صلاحیتوں اور لچک کو ظاہر کرنے کے لیے ایک اہم فورم کے طور پر کام کرتی ہے۔