تیز ہواؤں کے ساتھ بارشیں ہی بارشیں؛ محکمہ موسمیات کی نئی پیشگوئی

محکمہ موسمیات نے ملک کے مختلف حصوں میں موسم کی نئی صورتحال سے متعلق پیشگوئی جاری کر دی ہے، جس کے مطابق کئی علاقوں میں تیز ہواؤں کے ساتھ بارش کا امکان ظاہر کیا گیا ہے، جس سے موسم مزید سرد اور خوشگوار ہو سکتا ہے۔

رپورٹ کے مطابق صوبہ بلوچستان کے بیشتر اضلاع میں موسم خشک اور جزوی طور پر ابر آلود رہنے کی توقع ہے۔ تاہم کوئٹہ، زیارت، چمن، پشین، قلعہ عبداللہ اور قلعہ سیف اللہ میں تیز ہوائیں چلنے اور گرج چمک کے ساتھ بارش کا امکان بتایا گیا ہے۔

اسی طرح نوشکی، شیرانی، موسیٰ خیل، لورالائی، ہرنائی، ژوب اور بارکھان میں بھی بارش کی پیشگوئی کی گئی ہے۔ ان اضلاع میں تیز ہواؤں کے ساتھ گرج چمک کا امکان ظاہر کیا گیا ہے، جس سے درجہ حرارت میں کمی آ سکتی ہے۔

صوبہ پنجاب میں بھی موسم تبدیل ہونے جا رہا ہے۔ لاہور سمیت مختلف شہروں میں آج رات تیز ہواؤں کے ساتھ بارش ہونے کی توقع ہے، جس سے شہریوں کو گرم موسم کے بعد کچھ راحت مل سکتی ہے۔

یہ بھی پڑھیں: اقوام متحدہ کا آبنائے ہرمز کھولنے کا خیر مقدم، پاکستان کے کردار کو خراج تحسین

محکمہ موسمیات کے مطابق جہلم، گوجر خان، منگلا، حافظ آباد اور منڈی بہاؤالدین میں بھی بارش کا امکان ہے۔ ان علاقوں میں تیز ہوائیں اور گرج چمک کے ساتھ بارش ہو سکتی ہے، جس سے موسم خوشگوار ہو جائے گا۔

مزید برآں، گلگت بلتستان اور آزاد کشمیر کے بعض علاقوں میں بھی بارش کی پیشگوئی کی گئی ہے، جہاں چند مقامات پر تیز ہوائیں اور گرج چمک کے ساتھ بارش متوقع ہے۔