پنجاب سے سینیٹ کی خالی نشست پر انتخابات کی تاریخ کا اعلان

الیکشن کمیشن آف پاکستان (ای سی پی) نے سینیٹ میں پنجاب سے خالی ہونے والی جنرل نشست پر 29 مئی کو انتخابات کرانے کا اعلان کیا ہے۔ سینیٹ آف پاکستان میں یہ نشست سینیٹر پروفیسر ساجد میر کے 3 مئی 2025 کو انتقال کے بعد خالی ہوئی تھی۔

صوبائی الیکشن کمشنر کی جانب سے جاری نوٹیفکیشن کے مطابق پنجاب اسمبلی میں ہونے والے انتخابات کے لیے کاغذات نامزدگی 14 اور 15 مئی کو جمع کرائے جاسکیں گے۔ نامزد امیدواروں کے نام 16 مئی کو شائع کیے جائیں گے۔

کاغذات نامزدگی کی جانچ پڑتال 17 مئی کو ہوگی جبکہ ان کی منظوری یا مسترد ہونے کے خلاف اپیلیں 20 مئی کو دائر کی جائیں گی۔ اپیلوں کو 22 مئی کو نمٹا دیا جائے گا۔

امیدواروں کی نظر ثانی شدہ فہرست 23 مئی کو شائع کی جائے گی جبکہ 24 مئی تک کاغذات نامزدگی واپس لیے جاسکتے ہیں۔ پولنگ صبح 9 بجے سے شام 4 بجے تک پنجاب اسمبلی کے چیمبرز میں ہوگی۔

کاغذات نامزدگی دفتری اوقات کے دوران لاہور میں 10 کورٹ اسٹریٹ پر واقع پنجاب الیکشن کمیشن کے دفتر سے وصول کیے جاسکتے ہیں۔

معروف مذہبی و سیاسی رہنما سینیٹر پروفیسر ساجد میر 86 سال کی عمر میں دل کا دورہ پڑنے سے انتقال کر گئے۔ جمعیت اہل حدیث پاکستان کے سربراہ پروفیسر ساجد میر کا تعلق پنجاب کے ضلع سیالکوٹ کے مضافاتی علاقے سے تھا۔

میر 2021 میں مسلم لیگ (ن) کے سینیٹر منتخب ہوئے تھے، جو ان کی پانچویں بار پارٹی کے ٹکٹ پر سینیٹ انتخابات میں حصہ لے رہے تھے۔ انہوں نے مارچ 2009 سے مارچ 2015 تک سینیٹر کی حیثیت سے بھی خدمات انجام دیں۔

6 مئی کو کراچی میں صوبہ سندھ سے سینیٹ کی خالی ہونے والی نشست پر ہونے والے ضمنی انتخاب میں پیپلز پارٹی کے سید وقار مہدی نے کامیابی حاصل کی تھی۔

حکمراں جماعت پیپلز پارٹی اور اپوزیشن جماعت ایم کیو ایم پاکستان نے بالترتیب وقار مہدی اور نگہت مرزا کو نامزد کیا ۔ پی ٹی آئی نے کوئی امیدوار کھڑا نہیں کیا اور انتخابی عمل کے بائیکاٹ کا بھی اعلان کیا۔

ریٹرننگ افسر، صوبائی الیکشن کمشنر سندھ اعجاز انور چوہان نے بتایا کہ سندھ اسمبلی میں ہونے والے ضمنی انتخابات میں وقار مہدی نے 111 ووٹ حاصل کیے جبکہ ایم کیو ایم پاکستان کی نگہت مرزا نے 36 ووٹ حاصل کیے اور دو مسترد ہوئے۔ پولنگ کے مقررہ وقت کے دوران مجموعی طور پر 149 ووٹ ڈالے گئے۔

سینیٹ کی جنرل نشست 8 اپریل کو کراچی میں پیپلز پارٹی کے سینیٹر تاج حیدر کے انتقال کے بعد خالی ہوئی تھی۔ وہ مارچ 2021 میں سندھ میں سینیٹ کی جنرل نشست سے پیپلز پارٹی کے ٹکٹ پر 6 سال کی مدت کے لیے سینیٹر منتخب ہوئے تھے۔